Соёлын яам хэдхэн сарын өмнө БШУ-ны яамнаас "өрх" тусгаарлаж, үйл ажиллагаа явуулж буй. "Будаг нь ханхалсан" шинэхэн яамны бодлого чиглэл, хийж хэрэгжүүлж байгаа ажил нь олон нийтийн анхаарлыг эрхгүй татаж байна. 

Эдгээр өдрүүдэд Соёлын яамны сайдын зөвлөлд багтсан эрхмүүдийн талаарх мэдээлэл цахим орчинд хөвөрч, басхүү шүүмжлэл дагуулж эхэллээ.

Зөвлөлийн бүрэлдэхүүнд Төрийн хошой шагналт, Ардын жүжигчин, Хөдөлмөрийн баатар Н.Жанцанноров, Ардын жүжигчин Г.Жигжидсүрэн, Соёлын гавьяат зүтгэлтэн Г.Мэнд-Ооёо, Урлагийн гавьяат зүтгэлтэн, хөгжмийн зохиолч Л.Балхжав, ШУА-ийн тэргүүн, дэд ерөнхийлөгч, академич Г.Чулуунбаатар, Соёлын гавьяат зүтгэлтэн, бурханч лам Г.Пүрэвбат, Чингис хаан одонт, МУ-ын гавьяат жүжигчин Г.Ариунбаатар, Гавьяат жүжигчин Б.Жаргалсайхан, Гавьяат жүжигчин, "Чингис хаан" хамтлагийн ахлагч Д.Жаргалсайхан, Гавьяат жүжигчин, дуучин, продюсер Б.Дашдондог, Доктор, профессор Э.Сонинтогос, Монголын Урчуудын Эвлэлийн шагналт зураач А.Чадраабал, Неро энтертайментийн найруулагч Б.Баатар, Соёлын гавьяат зүтгэлтэн, нэвтрүүлэгч Д.Цоодол, Гавьяат жүжигчин Н.Онон нар багтжээ. 

Соёлын яамны зөвлөлд эдгээр хүмүүс багтсан нь зөвхөн урлагийн яам мэт болж хувирлаа гэх шүүмжлэл дагуулж байна.

Соёлын яам нь нийт 11 нэгжтэй, долоон газартай. “Тэргүүлэх урлаг, уран бүтээлийн бодлогын газар, Соёлын өвийн газар, Соёл, гэгээрлийн газар гэсэн гурван гол газарт үйл ажиллагаагаа тулгуурлан явуулна” гэдгийг тухайн үед Соёлын яамны Урлаг, уран бүтээлийн бодлогын газрын дарга Б.Сэргэлэн онцолж байсан билээ. 

Гэтэл дээрх зөвлөлийн бүрэлдэхүүнийг харахад соёл гэдэг нь дан ганц урлаг, уран сайхан мэт ойлгогдох.

Угтаа соёл иргэншил бол соёлын хөгжил, төлөвшлийн биелэл. Тэгэхээр түүхч, археологич, антропологич гэх мэт мэргэжлийн хүмүүс тус зөвлөлд багтсан бол олон нийтээс илүү үнэлгээ авч, далайцтай ажиллах боломж бүрдэх байлаа.

Гэхдээ Соёлын яамны сайд С.Чулуун нь шинжлэх ухааны академийн түүх, археологийн хүрээлэнгийн захирлаар ажиллаж байсан, дэд сайдаар нь архитекторч М.Батбаяр ажилладаг болохоор энэ чиглэлдээ хангалттай гэж үзсэн байхыг ч үгүйсгэхгүй юм. Гэхдээ л зөвлөлд түүхч, археологич, антропологич багтаагаагүй нь олон хүнийг халаглуулж буй юм.  

Ямартай ч зөвлөлийн анхдугаар хуралдаан өнөөдөр болж, соёлын салбарын бүтээн байгуулалт, УИХ-аар хэлцэгдэж буй Соёлын тухай хууль, Киноны тухай хууль, Музейн тухай хуулийн төслүүдийн танилцуулгыг хийх юм байна.  

Б.Баатар