Гишүүд Төрийн ордонд архидан согтуурсан байж болзошгүй талаарх мэдээлэл цахим сүлжээгээр цацагдаж эхэллээ.

Тодруулбал, согтууруулах ундаа болон бусад ууттай хог ЗГХЭГ-ын дарга Л.Оюун-Эрдэнийн өрөөний ойролцоо байсан гэх.

Энэ бол зөвхөн албан бус мэдээлэл гэдгийг сануулах нь зөв байх. Төрийн ордонд ойрын хугацаанд ийм асуудал гарсан уу. Тантай холбоотой юу гэдэгт тайлбар өгнө үү, Л.Оюун-Эрдэнэ сайд аа.

ЗГХЭГ-ын дарга, одоогийн УИХ-ын дарга Г.Занданшатар “2019 оны нэгдүгээр сарын 1-нээс төрийн байгууллагын ажлын байранд согтууруулах ундаа нэвтрүүлэх, хадгалах, хэрэглэхийг хатуу хориглож, нэвтрүүлэхийг завдсан тохиолдолд сахилгын хариуцлага тооцож, хадгалж, хэрэглэсэн нь тогтоогдвол шууд ажлаас халах шийтгэл ногдуулах”-аар болсон талаар дуулиантай мэдэгдэж байсан. Хэрэв дээрх асуудал үнэн бол албан тушаалаасаа огцрох хүртэл арга хэмжээ тооцуулах нь. Та энэ талаар мэдээлэл өгч, иргэдийн эргэлзээг тайлна уу.

Ер нь Төрийн ордонд гишүүд архидан согтуурдаг талаар ам дамжин яригддаг. Энэ нь ч үнэн болж архидан согтууралт эмгэнэлт байдлаар дуусаж, нэг гэр бүлийн аав, нөхөр нь үүрд салан одсон. Үүнээс сургамж аваагүй юм биш биз.

Угтаа бол Төрийн ордонд юу хийж болох, болохгүйг цагаан дээр хараар тэмдэглээд, хуульчлаад өгчихсөн шүү дээ. Тодруулбал, Төрийн ордны тухай хуулийн 11.2.4-д “Төрийн ордон, түүний нутаг дэвсгэрт согтуугаар нэвтрэх, төрийн ёслолын чанартай арга хэмжээнээс бусад тохиолдолд согтууруулах ундаа хэрэглэхийг хориглоно”.

Хэрэв уг хуульд заасан хориглох заалтуудыг зөрчвөл 13.1 “Энэ хуулийг зөрчсөн албан тушаалтны үйлдэл нь гэмт хэргийн шинжгүй бол Төрийн албаны тухай хуульд заасан хариуцлага хүлээлгэнэ”, 13.2 “Энэ хуулийг зөрчсөн хүн, хуулийн этгээдэд Эрүүгийн хууль, эсхүл Зөрчлийн тухай хуульд заасан хариуцлага хүлээлгэнэ” гэж заасан. Дээр нь нөгөө сахилгын шийтгэлийн хариуцлага бий шүү дээ. Энэ асуудлыг тодорхой болгож өгнө үү, сайд аа.

А.Сүх