ХӨСҮТ-ийн эмчилгээний багийн сувилагчаас коронавирусийн халдвар илэрсэнтэй холбогдуулан халдварын нөхцөл байдлыг тогтоох, авах арга хэмжээний талаар УОК хуралдсан. Хурлын шийдвэрийн талаар яг одоо мэдээлэл хийж байна. Коронавирусийг дотроо алдаагүй учраас ямар нэгэн хорио тогтоохгүй гэдгийг Я.Содбаатар мэдээллээ. 

Энэ талаар тэрбээр "Өнөөдөр халдвар хамгааллын дэглэм сахих асуудал тун чухлаар тавигдаж байгаа бөгөөд дэлхий нийтэд СOVID-19 халдварын хоёр дахь давлагаа эрчимтэй явагдаж, өвчлөл нас баралт нэмэгдэж байгаа тул бид дотооддоо эрсдэлээ бууруулах арга хэмжээг авах зайлшгүй шаардлага гарлаа. Мөн Алтанбулагийн боомт дээр УОК-ын гишүүд очиж ажиллаж байгаа. Тус боомт нь хамгийн эрсдэлтэй нөхцөл байдал үүссэн. Тиймээс нөхцөл байдлыг дүгнээд ирэх долоо хоногийн Засгийн газрын хуралдаан тодорхой шийдвэр гаргахаар бэлтгэж байгаа.

Өнөөдрийн байдлаар манай улсын ургац хураалтын ажил 95 хувьтай байгаа бол мах бэлтгэх ажил ид эхэлж байна. Өнөөдрийн байдлаар Монгол Улсын хэмжээнд хүнсний хангамж төлөвлөсөн хэмжээнд байна. Ямар нэг хомсдол бий болох нөхцөл үүсээгүй. Гэхдээ цаашид эрсдэлт нөхцөл байдал буюу дотроо халдвар тархсан нөхцөлд хүнсний хангамж нөөцийн байдал ямар байгааг хэлэлцэж, тодорхой шийдвэр гаргах хэрэгтэй.

УОК-оос ямар нэг хөл хорио, хязгаарлалт хийх шийдвэр гаргаагүй. Учир нь олон нийтийн сүлжээгээр ийм утгатай мэдээлэл, хэлэлцүүлэг өрнөж байна. Монгол Улсад коронавирусийн халдвар дотоодод тархаагүй тул өнөөдрийн байдлаар УОК-оос ямар нэг хориглолт, хязгаарлалт хийсэн шийдвэр гаргаагүй. COVID-19 халдвартай хүнийг эмчилж байсан сувилагчаас халдвар илэрсэнтэй холбоотой буруу ойлголт явж байна. Тухайн сувилагч бол дотроо буюу халдвар хамгааллын дэглэмдээ ажиллаж байсан бөгөөд ямар нэг байдлаар гадаад орчинд, энгийн иргэдтэй харилцсан зүйлгүй” гэдгийг онцоллоо. 

Б.Баатар