ОХУ-д Ковидын халдварын дэгдэлт өндөр байгаа учраас манай улс Цагаан нуур, Боршоо боомтыг хаагаад буй. Дээрх боомтуудыг хааснаар хүнсний барааны хомсдол үүсэх эсэх талаар ХААХҮ-ийн сайд З.Мэндсайхан мэдээлэл өглөө.

Тэрбээр "Манай яам хүнсний гол нэрийн бүтээгдэхүүний нөөцийн судалгааг гаргасан. Судалгаагаар долоон нэр төрлийн хүнс байх түвшиндээ байна. Цагаан нуур, Боршоо боомтыг хааснаар хүнсний гол  нэрийн бүтээгдэхүүний нийлүүлэлт тасрахгүй. Учир нь дээрх хоёр боомтоор зөвхөн цагаан будаа оруулж ирдэг. Төмөр замын тээвэр хэвийн үргэлжилж байгаа учраас айх зүйл байхгүй. Нөхцөл байдал хүндэрвэл хүнсний хангамжаа хэрхэн бүрдүүлэх талаар судалгаа хийж байна. ОХУ энэ онд улаанбуудай хангалттай хэмжээнд тариалсан. Харин Европын холбоо ургац алдсан. Иймд манай хойд хөрш ирэх оны нэгдүгээр сарын 1-нээс улаан буудайн худалдаандаа квот тогтоох мэдээлэл авсан. Ирэх долоо хоногт Хүнсний аюулгүй байдлын зөвлөл хуралдана. Бид хүнсний нөөц болон бусад асуудлыг хэлэлцэнэ" гэлээ. 

Б.Баатар