БНХАУ-ын 74 иргэн Замын-Үүдийн боомтоор хил нэвтэрсэн баримт ил боллоо.

Сүүлийн өдрүүдэд хятад ажилчид манай улсад ихээр орж ирэх болсон гэх мэдээлэл цахим орчинд түгэж, олны анхаарлыг татаад байгаа билээ. Тэгвэл дээрх иргэд 10 дугаар сарын 21-ний өдөр Замын-Үүдийн боомтоор хил нэвтэрсэн бөгөөд "Монгол Тамхи со", "Стандарт шуудай", "Эм Эй ЖИ ЭЛ АЙ" ХХК, "Ноён капитал", "Томо бюлдинг", "Дархан ээж шүтээн" зэрэг компанийн урилгаар манай улсад иржээ.

Баримтаас харахад, "Монгол Тамхи со" ХХК-ийн 9 ажилчин, "Ноён капитал" ХХК-ийн 5 ажилчин,  "Томо бюлдинг" ХХК-ийн 3 ажилчин, "Стандарт шуудай" ХХК-ийн 11 ажилчин, "Эм Эй ЖИ ЭЛ АЙ" ХХК-ийн 5 ажилчин, "Дархан ээж шүтээн" ХХК-ийн 41 ажилчин, нийт зургаан компанийн 74 ажилчныг 94-74 УБП, 79-79 УАЕ, 41-27 УНЗ, 41-60 УНЗ, 76-67 УНУ, 03-01 УБМ улсын дугаартай автобусаар Замын-Үүд Олон улсын автозамын боомтоор нэвтрүүлж, цагдаагийн 01-90 ДГС улсын дугаартай автомашинд хүлээлгэн өгсөн байх аж. 

Шадар сайд Я.Содбаатар өнгөрсөн амралтын өдөр хийсэн мэдээлэлдээ "БНХАУ-аас орж ирж байгаа ажиллах хүчинтэй холбоотой худал мэдээлэл явж байна. Энэ жил маш бага хэмжээгээр буюу зөвхөн удирдах албан тушаалтан, инженер техникийн ажилтнуудыг гаднаас оруулж ирж байгаа. Тэд төрийн ажил л гүйцэтгэхээр орж ирж буй. Ийм шаардлага нь ч Монгол Улсын нийгэм, эдийн засагт байгаа.

Гадны ажиллах хүчийг маш хатуу хяналт доор, цөөн тоогоор, хоёр улсын гэрээ хэлэлцээрийн хүрээнд, хууль хүчний байгууллагын хяналт доор ажиллуулж байгаа. Он дуустал БНХАУ-аас ажиллах хүчин оруулж ирэхгүй, зогсоосон. 

Иргэдийг төөрөгдүүлж, улстөрийн зорилгоор хандаж буй уг асуудалд хуулийн байгууллагаас арга хэмжээ авна. Энэ асуудалтай холбоотой худал мэдээллийг зохион байгуулалттайгаар цөөн тооны хүмүүс олон нийтийн сүлжээнд дэвэргэж байна" гэдгийг онцолсон.

Гэтэл дээрх хятадууд хувийн компанийн урилгаар манай улсад ирсэн байх аж. Үүнийг Шадар сайд Я.Содбаатар мэдсэн үү эсвэл мэлзээд өнгөрч буй юм болов уу гэх асуулт хариултаа нэхэж эхэллээ.

Ямартай ч өнгөрсөн сард манай улсад 74 хятад иргэн хил нэвтэрсэн, тэд хувийн компанийн урилгаар ирсэн нь олон нийтэд ил болов.

Б.Баатар