УИХ-ын ээлжит сонгуулиар МАН зарим гишүүддээ албан тушаал амлаж, нэр дэвших эрх олгоогүй гэсэн мэдээлэл олон нийтийн сүлжээнд гарч байсан. Тэгвэл уг тохироо үнэн болох нь эхнээсээ нотлогдож эхэллээ.

Тодруулбал, Үндэсний статистикийн хорооны даргаар УИХ-ын гишүүн асан Ц.Цогзолмаагийн нэр яригдаж эхэллээ.

Уг томилгоог удахгүй чуулганы нэгдсэн хуралдаанаар хэлэлцүүлэхээр зэхэж буй аж.

Түүнчлэн сүүлийн өдрүүдэд Эрдэнэт ТӨҮГ-ын дарга Х.Бадамсүрэн эрх мэдэл, албан тушаалаа ашиглан төрийн мөнгөөр хүүхдийнхээ мөнгийг төлүүлж, өндөр үнэтэй машин, унадаг дугуй худалдан авсан зэрэг олон асуудал “Шилэн данс”-аар ил болсон. Улмаар МАН-ын бүлгийн зарим гишүүд Эрдэнэт ТӨҮГ-ын дарга Х.Бадамсүрэнг хийсэн үйлдэлдээ хариуцлага хүлээх ёстой гэсэн байр суурь илэрхийлсэн.

Тэгвэл дээрх асуудалтай холбогдуулан Х.Бадамсүрэнгийн орыг залгах дараагийн хүний нэр яригдаж эхэллээ.

Түүний орыг УИХ-ын гишүүн асан, Ерөнхий сайдын зөвлөх Ж.Энхбаяр залгаж магадгүй бололтой. Ийм бор шувуу гараад эхэлсэн байна.

Дээрх хоёр эрхмийн хувьд өнгөрөгч сонгуулиар Ж.Энхбаяр намын даргаасаа нэр дэвших эрх авч чадаагүй. Нөгөө нь Ховд аймагт нэр дэвшээд унасан билээ. 

МАН-ын өмнөх парламентын гишүүд эхнээсээ албан тушаалд яригдаж эхэлсэн нь дээр тэмдэглэсэн албан тушаалын "тохироо"-г баталж буй юм. Ер нь гишүүд болон сайдууд намын даргаасаа нэр дэвших эрхээ олж авч чадаагүй, эрхээ авсан ч сонгогдож чадаагүй зэрэг аль ч тохиолдолд албан тушаалын үзүүрээс зуураад үлддэг нь жишиг болж.

А.Сүх