Улсын Дээд шүүхийн шүүгчид нэр дэвшигчтэй холбоотой маргаан Үндсэн хуулийн Цэцэд хүрэх бололтой. Хууль зүйн байнгын хороо Шүүхийн ерөнхий зөвлөлөөс оруулж ирсэн хоёр хүний нэгийг нь дэмжиж, нөгөөг нь зад шүүмжлээд хүлээж аваагүй. Гэвч зүтгүүлсээр байгаагийн учрыг ихээхэн ашиг сонирхол үүний цаана нуугдаж байна хэмээн УИХ-ын гишүүд шүүмжилж буй.

Монгол Улсын Ерөнхийлөгчийн хувьд УИХ-д танилцуулахгүйгээр томилох эрхгүй учраас маргаантай энэ асуудал Үндсэн хуулийн Цэцэд “очиж” мэдэхээр байна.

Нэг хэсэг нь зүтгүүлээд, нөгөө хэсэг нь гэдийж явсаар энэ парламентын хугацааг ч дуусгаж болно. Гэвч ийм хөлдөө хөгөө чирсэн явдал болохгүй биз ээ.

“Голомт”-ын төлөөлөл, хууль, шүүхийн байгууллагад ажиллаж байгаагүй гэдгээрээ адлуулаад байгаа С.Батхүлэгийг Шүүхийн ерөнхий зөвлөлөөс оруулж ирж байгаа мэт харагдавч үнэн чанартаа Монгол Улсын Ерөнхийлөгчийн асар их ашиг сонирхол цаана нь бий гэсэн хардлагыг гишүүд үгүйсгэхгүй байна.

Улсын Дээд шүүхийн шүүгчид С.Батхүлэгийг томил. Эс бөгөөс Элчин сайдуудын томилгоог гацаана гэсэн “бойкот” явж буйг ил далд хэлэх боллоо.

Он дамнан гацаанд орсон Элчин сайдуудын томилгоог одоог хүртэл хийхгүй гэдийсээр байгааг ингэж ойлгохоос аргагүй юм. Оны өмнө арав гаруй хүний нэрийг оруулсан ч хориг тавьсан. Одоогоор нийт хориод улсын Элчин сайд нарыг томилох асуудал ийнхүү Ерөнхийлөгчийн эрх ашиг дор хүчин мөхөсдөөд байна.   

У.Тэргэл