Коронавирусний халдвар гаднаас зөөвөрлөгдөн орж ирж байгаа. Дотооддоо алдаагүй шүү гэх мэдээлэл олныг тайвшруулж байсан ч хэдхэн хоногийн өмнө өвчтөнүүдэд үйлчилж байсан сувилагч халдвартай нь илэрсэн билээ. Харин өнөөдөр зургаан хүн нэмж халдварласны нэг нь ХӨСҮТ-ийн 27 настай эмч гэсэн мэдээллийг ХӨСҮТ-ийн захирал Д.Нямхүү өглөө. Эмч халдвар авсан сувилагчтай ойр байсан таван хүний нэг бөгөөд 19 дэх хоногт нь ийн “Ковид-19” илэрчээ. Энэхүү мэдээлэл олон хүнд айдас төрүүлж, сургууль, цэцэрлэгийг хаая гэсэн санал, хүсэлтээр цахим ертөнц давалгаалж байна.

Өмнө нь өдөрт ганц хоёроор нэмэгддэг байсан халдварын тохиолдол өдгөө 9, 10-аараа илэрдэг болсон. Мөн 19,21 хоногт нь “Ковид-19”-ийн халдвар илэрч  байгаа нь тусгаарлалтын хугацааг наашлуулах боломжгүй гэдгийг харуулж байгаа гэдгийг ХӨСҮТ-ийнхөн хэлдэг. Эмч, сувилагчдаас коронавирусний халдвар илэрч буй нь тэд цаг наргүй ажилласнаас дархлаа нь суларсантай холбоотой гэдгийг ч өөрсдөө хүлээн зөвшөөрч байна.