Тэтгэврийн доод хэмжээг 500 мянган төгрөгт хүргэх ёстой гэж УИХ дахь Ардчилсан намын бүлэг үзэж байгаа. Энэ байр сууриа хуулийн төсөл болгосон бөгөөд өргөн барих үе шатандаа яваа гэдгийг бүлгийн дарга Д.Ганбат мэдээлсэн билээ.

Тэрбээр өчигдөр "Өдрийн сонин"-д өгсөн ярилцлагадаа "Тэтгэврийн доод хэмжээг 500 мянган төгрөгөөс дээш байхаар хуулийн төсөлд тусгасан.

Хуулийн төслийг санаачлах болсон зорилго ойлгомжтой. Өнөөдөр 500 мянган төгрөгөөс доош тэтгэвэр өрхийн хэрэглээг хангаж чадахгүй.

Шаардлагатай эмээ ч авч дийлэхгүй мөнгө. Тиймээс ядаж ханшийн уналттай дүйцүүлэн тэтгэврийн хэмжээг нэмэх ёстой. Эх үүсвэр нь Цагаан суварга байх ёстой гэж зарим гишүүн, Ерөнхий сайд, Ерөнхийлөгч үзэж байгаа юм билээ. Миний хувьд эсрэг байр суурьтай байгаа. Хувийн хэвшил хуулийн дагуу ажлаа хийж байхад төр засаг оролцох шаардлагагүй. Бүх зүйл хуулийн дагуу байх хэрэгтэй. Энэ зэргийн тэтгэврийн эх үүсвэрийг Засгийн газар олох ёстой. Хийх ёстой ажил нь" гэж онцолсон байна. Түүний ярилцлагаас харвал, Ерөнхийлөгч, Ерөнхий сайд болон зарим гишүүн Цагаан суваргын ордыг төрд авах асуудлыг дэмжиж байгаа гэж ойлгохоор байна.

Цагаан суваргын ордын тайлангаас харвал, жилдээ 480 орчим тэрбум төгрөгийн цэвэр ашигтай ажиллахаар тооцсон байх бөгөөд харин тэтгэврийн доод хэмжээг нэмэгдүүлэхэд жилд гарах зардал нь мөн 400 гаруй тэрбум төгрөг болохыг мэдээлж байсан.

Хэрэв тэтгэврийн доод хэмжээг 500 мянган төгрөг болгож нэмэгдүүлэх хуулийн төсөл батлагдаж эх үүсвэр нь Цагаансуваргын орд байх юм бол төр 100 хувь эзэмшилдээ авч байж л тэтгэврийн нэмэгдлийг санхүүжүүлэх нь.

Юутай ч энэ хуулийн төслийг эрх баригчид дэмжих эсэх, цаашлаад Цагаансуваргын ордыг төрд авах уу гэдэг асуулт үлдэж байна.

Ардчилсан намын хувьд баруун төвийн үзэлтэй, хувийн өмчийг дээдэлсэн бодлоготой намын хувьд уг хуулийн төслийг өргөн барихдаа санхүүжүүлэх эх үүсвэрийг “хоёрдмол” утгатай илэрхийлсэн нь ийнхүү бүлгийн даргынх нь ярилцлагаас өөр өөр байр суурьтай байгааг илтгэж байна. Харин Д.Ганбат тэтгэврийн доод хэмжээг нэмэхдээ хувийн хэвшил рүүгээ төр дайрах бус байгалийн баялгаас олсон орлогоороо сан байгуулан сангаасаа санхүүжүүлэх бүрэн боломжтой гэж үзэж байгаагаа илэрхийлжээ.