УИХ дахь МАН-ын бүлгийн дарга Д.Тогтохсүрэн өөрийн цахим хуудсаар дамжуулан "Хөдөө орон нутгийн иргэдийг энэ лхагва гарагт буюу 11 сарын 18-ны өдөр нэгдсэн журмаар гаргах болсон" талаар мэдээлсэн нь шүүмжлэл дагуулсан талаар бид өмнө нь мэдээлсэн билээ.

Тодотговол, Д.Тогтохсүрэнгийн цахим хуудсаараа дамжуулан "Хөдөө орон нутгийн иргэдийг энэ лхагва гарагт гаргана" гэсэн мэдээллийг Засгийн газрын  хэвлэлийн албанаас үгүйсгэж, "Хотод гацсан иргэдийг нутаг буцаах асуудал яригдаагүй. Батлагдсан тохиолдлуудын нэгдүгээр болон дам хавьтлын шинжилгээ бүрэн хийгдэж дуустал ямар ч хөдөлгөөн хийгдэхгүй. 21 аймаг болон нийслэл хотод орох, гарах хөдөлгөөнийг бүрэн хаасан. 

Онцгой нөхцөл байдлын үед худал мэдээлэл тарааж, олон нийтийг төөрөгдүүлэхгүй байхыг хүсч байна" хэмээн нэрийг нь цоллоогүй ч чимээгүйхэн "донгодож" орхисон юм. 

Харин Д.Тогтохсүрэн гишүүн дээрх мэдээллийнхээ хариуг мөн л цахим хуудсаараа дамжуулан барив. 

Тэрбээр "Худал мэдээлэл тараагч" гэж хэвлэлүүдээр гарч буйд хариу өгье, COVID-19 дэгдэлттэй холбоотойгоор улс орон даяар хөл хорио тогтоосон энэ үед орон нутгаас нийслэлд ирээд хоригдчихсон иргэдэд маш олон хүндрэл бэрхшээл тулгарч байна. Орон нутгийн иргэдийн зүгээс УИХ-ын гишүүдэд хандаж, ямар нэгэн арга хэмжээ авахыг хүсч буй тул энэ асуудалд анхаарах хэрэгтэй гэж манай бүлгийн гишүүд удаа дараалан санал тавьсан. 

Бид дээрх хүсэлтийн дагуу "тэдгээр иргэдийг нэг удаа гаргах ажлыг зохион байгуулмаар байна" гэж УОК-т санал тавьсан. УОК асуудлыг судлаад "нөхцөл байдал одоогийн түвшингээс хүндрэхгүй бол ирэх Лхагва гарагт буюу энэ сарын 18-ны өдрөөс хөдөөнөөс нийслэлд ирээд гацсан иргэдийг нэг удаа гаргах ажлыг тодорхой хяналт, шинжилгээ, нарийвчилсан журам гаргаад гаргахаар ярилцаж байгаа" гэсэн хариу өгсөн.

Тэр хариуг бүлгийн гишүүддээ мэдээлж, өөрийн цахим хаягаар иргэдэд мэдээлсэн. Гэтэл өнөөдөр худал мэдээлэл тараагч гээд "цоллоод" эхэлжээ.

Халдварын дэгдэлттэй энэ цаг үед үүсч байгаа аливаа асуудал бэрхшээлийг даван туулж гарах нь хамгийн чухал. УОК-т тавьсан санал, тус саналд өгсөн хариуны дагуу нийслэлд ирээд гацчихсан иргэдийг нарийн дүрэм журам, хяналт, шинжилгээ хийж өрх гэрт нь буцаах нь цөөнгүй иргэд, өрх гэрийн өмнө тулгамдаж байгаа асуудлуудыг шийдвэрлэнэ. Хотод ирээд байрлах газар байхгүй, буцаж чадахгүй машиндаа хоноглож, аргаа барж байгаа олон иргэдийн хүсэлт бий.

Иймд бид чи, би-гээ дуудалцахаас илүүтэй энэ асуудалд гарц шийдэлд хүрэх нь чухал. Өчигдөр бидэнд өгсөн хариуныхаа дагуу УОК-ыг хотод гацсан иргэддээ анхаарал хандуулж, боломжит байдлаар шийдвэрлэнэ гэдэгт итгэж байна.

Тодорхой шийдэлд хүрч байж, Нийслэлд гацсан иргэд хүлээцтэй тайван байна. Ямар нэг нууц, далд хэлбэрээр орон нутгаа зорихгүй, хяналт шинжилгээний хүрээнд асуудалд хандана шүү дээ" хэмээв.

Дээрх мэдээллээс үзэхэд Д.Тогтохсүрэн гишүүнд буруу байхгүй бололтой юм даг. Ямартай ч Засгийн газар, Улсын Онцгой комисс нэгдсэн журмаар мэдээллээ олон нийтэд хүргэдэг байх зохицуулалт хийсэн гэдгийг эрхэм гишүүнд дуулгах нь зүй болов уу. 

Б.Баатар