Хүмүүс ихэвчлэн цалингаа дараагийн удаа хэрхэн нэмүүлэх вэ гэсэн асуултад төвлөрдөг. Ер нь яагаад орлого олох ерөнхий чадамж, потенциал дээрээ анхаарч болохгүй гэж? Өнөөдрийн өөхнөөс маргаашийн уушги гэгчээр хожмын удаа цалингаа илүү жинтэй нэмэгдүүлэх үндэс суурийг тавихын тулд одооноос та юу хийж чадах вэ? Жоржтауны их сургуулийн судалгаагаар их сургуулийн дипломтой хүн амьдралынхаа туршид ойролцоогоор 1.3 сая ам.долларын орлого олдог аж. Харин бакалаврын дипломтой хүний хувьд насан туршдаа 2.3 сая ам.доллар олох боломжтой. Та үүнийг хэрхэн давуулан биелүүлэх вэ? Насан туршдаа үүнээс их мөнгө олохын тулд юу хийж болох вэ?

Миний уншсан нэг түүх толгойноос огт гардаггүй юм. Жек Кэнфилд бол “Chicken Soup for the Soul” буюу үгчилбэл “Сэтгэл оюуны шөл” хэмээх уншигчдыг татах увдистай номуудыг бичсэн зохиолч. Тэрбээр цуврал номоороо асар их орлого орлоод зогсохгүй Нью-Йорк Таймсын бестселлер номын жагсаалтад нэгэн зэрэг 7 номоо “сойж” чадсан амжилтаараа Гиннесийн дээд амжилтын эзэн болсон нэгэн. Түүний номууд уншигчдын сэтгэлийн чавхдасыг хөнддөг байж болох ч өөрийнх нь амжилтын түүх кино шиг гэж хэлэх ч багадна. Хэчнээн олон хүний номынх нь санааг үл ойшоож, эцэст нь нэгэн хүн мөрий тавихаар шийдсэн тухай Кэнфилд дурсан ярьжээ. Ингээд жил хүрэхгүй хугацааны дараа номыг нь хэвлэсэн хэвлэлийн компаниасаа анхны 1 сая ам.долларын чекээ хүлээн авсан байна. Тэрбээр энэ амжилтад хүрэхээсээ өмнө өөртөө яг 1 сая ам.долларын чек бичихээр шийдсэн тухайгаа мөн дурссан билээ. Тэрбээр 8,000 ам.долларын цалинтай ч нэгэн удаа тоглоом шоглоом болгон 100 мянган ам.долларын чек өөртөө бичсэн бөгөөд тухайн жил дуусах үед бараг 100 мянгыг олсноо өөрөө ч анзаараагүй байж. Ингээд дараагийн зорилго нь? 1 сая ам.доллар.

Пөөх, үнэхээр ид шид байдаг юм уу гэж үү? Яг ч тийм биш. Энэ концепц нь 12 сарын дараа гэхэд компанийнх нь орлого яг тэд болно гэж төлөвлөдөг гүйцэтгэх захирлуудын арга барилаас төдийлөн ялгарахгүй. Өөрөөр хэлбэл, зорилгоо зураг шиг дүрсэлж, бодит мэтээр харж, үүнийгээ ажил хэрэг болгохын тулд нөөц бололцоонуудаа дайчлах хэрэгтэй гэсэн үг. Гол зорилгоосоо хараагаа огт салгадаггүй компанийн хувьд энэ бол боломжтой зүйл. Таны хувьд ч мөн ялгаагүй. Хуудас цаасан дээр хэдэн тоо бичээд түүнийгээ өдөр бүр харахад л хангалттай төвлөрч чадах үе заримдаа байдаг шүү дээ.

Монгол хэлнээ орчуулагдан гарсан “Ухаалаг Ажиллах нь” номын хэсгээс....

Зохиогч Бетти Лью

Э.Анхбаяр