Түрээсийн талбайд эмнэлгийн үйл ажиллагаа явуулж байгаад гадаадын (Япон) хөрөнгө оруулалтаар МҮОХ-ны дэргэдэх “Тамирчин нөхөн сэргээх төв”-ийн таван давхар байрыг худалдан авч, “Өөжинмед” эмнэлгээ нүүлгэж оруулсан гэж Э.Бадар-Ууган ярьдаг. Гэвч тамирчдад зориулсан цөөхөн байгууламжийн нэг болох таван давхар байр халааснаас халаас дамжиж, хувьчлагдаад "хүний юм" болчихсон нь сонин. Олимпын аварга гэх гавьяа нь Э.Бадар-Ууганд өгч болох бүхнийг л авчирсан байдаг. Харин ямар сайндаа л тамирчдынх байх ёстой асан өмчид эзэн сууж байх билээ. Ажилладаг газрынхаа хаяа хатавчин дахийг “онилсон” түүнд нийтээрээ өртэй бололтой. 

Өнөөх ТҮЦ ачигч, хувийн өмч рүү хайр найргүй цөм өшиглөн орогч нэр зүүгээд байгаа хотын дарга Х.Нямбаатарын сүржин даржин үгс хэнд үйлчлээд, хэнд үйлчилдэггүй юм бол доо. Машины чинь татварыг нэмнэ гэхээр нэмүүлчихлээ, хотын дугаар олгохгүй гэхээр хүлцчихлээ, орон нутгийнхан хотод сүлжилдвэл мөнгө төлнө гэхээр нь тэвччихлээ, иргэд. Улаанбаатар хот цементэн ширэнгэн ой болсныг гайхаад л байсан, стандарт гэсэн сүр бадруулж, энд тэнд зам хуулж, нурааж, бордьюр сольж, иргэдээс газрыг нь авч бужигнуулж байгаа. Гэтэл боксчин явсан Э.Бадар-Ууганд манай хотын даргын стандарт үйлчилдэггүй ээ. Зай завсаргүй шигүү хотын төвд дахиад нэг өндөр барилга босгохыг зөвшөөрч байна гэж үү. 

МҮОХ-ны урдны "албан тушаалтнууд"  тус холбооны өмчид байсан Тамирчин нөхөн сэргээх сувиллыг "ХХК" болгон өөрчилж, нэг хүний өмчид шилжүүлээд зогсохгүй, цааш нь ашиг олох зорилгоор худалдан борлуулсан нь одоогийн "Өөжинмед" эмнэлгийн байр болж хувирсан талаар тухайн үед хэвлэл мэдээллийн хэрэгслүүдээр баримтуудыг нь дэлгэн бичиж байв. Атал хөдөлмөрийн баатар абугай асуудлаас нэрээ цэвэрхэн авч гарах санаатайгаар барахгүй, “Хулгай хийж биш, худалдаж авсан” хэмээн ярьж байжээ. 

Э.Бадар-Ууган “Өөжинмед” үр шилжүүлэн суулгах төвөө томруулж "Нөхөн үржихүйн эмчилгээ, үйлчилгээний цогцолбор" эмнэлгийг Хан-Уул дүүргийн 15 дугаар хороонд байрлах Цэнгэлдэх хотхонтой залгуулан барихаар газар, шорооны ажлаа эхлүүлчихсэн байж байгаад тус хотхоны оршин суугчдын эсэргүүцэлтэй тулгарсан юм. Ингээд хэсэг чимээ тасарч байгаад дахин гарч ирэхдээ гархиа нэмээд гарч иржээ. 

Цэнгэлдэх хотхоны иргэд 2023 оны наймдугаар сараас хойш иргэд эл барилгын ажлыг "хууль бус" хэмээн үзээд тэмцэж байгаа юм. Түүнчлэн Хотын стандарт хяналтын газраас "Энэ барилга гурван төрлөөр стандарт шаардлага хандахгүй байна" гэсэн хариуг иргэдэд өгсөн байдаг. Тодруулбал, Рапид хотхоны цэвэр усны шугамаас 5 метрийн зайтай зураг төсөл гаргах ёстой байтал 4 метр зайтай зураг төслийг гаргасан байна. Мөн Рижес хотхон оффисын гурван шугамнаас 5 метрийн зайтай байх ёстой ч зөрчжээ. Ингээд зогсохгүй, доошоо 4 давхарын зоорьтой 23 давхрын өндөртэй байхаар зураг төслөө батлуулчхаад дараа нь 14 давхар, доошоо 5 давхар гэж зургаа өөрчилсөн гэж оршин суугчид хэлж байв. Үүнээс гадна 210 дугаар байрны айлуудын үзэгдэх орчин, ээвэрлэлтийг хаах аж.

Улмаар иргэд нийлж, Хотын стандартын газарт гомдол гаргахад "2025 оны хоёрдугаар сарын 8-ны өдөр барилгын ажлын зөвшөөрлийн гэрчилгээний хугацаа дууссан. Хотын хяналт шалгалтын газар болон Нийслэлийн газар зохион байгуулалтын газарт хандана уу" гэсэн албан бичгийг ирүүлжээ. 

Зөвшөөрөл нь дуусчихсан байхад Э.Бадар-Ууганы барилга бол үргэлжлээд байна, халдашгүй дархан эрх гэж энэ биз. 

Э.Бадар-Ууганы шинэ эмнэлгийн газар шорооны ажил бүр хашаанаасаа халиад, байт харвааны газар дээр шороогоо асгаж, Бэйсболын талбайн хашааг цаашлуулаад машин тэргээрээ чөлөөтэй сүлжиж байгаа юм билээ. Иймээс оршин суугчдад "хамтраад дараа дараагийн барилгын ажлынхаа суурийг тавьж байна" гэх хардлага үүсэх нь арга ч үгүй.

Хотын мээр Х.Нямбаатар Сонгинохайрхан дүүрэгт Бэйсболын талбай барина гээд байсан нь үүнтэй холбоотой байна гэж байх уу? Байгаагаа засаж сэлбэж, тордож чадахгүй байж яасан ч олон мөрөөдөлтэй юм бэ дээ гэмээр ч шиг. Шинэ суурьшлын бүс энэ тэр бүр инээдэм биз дээ. 

Үнэн хэрэгтээ хотын дарга Х.Нямбаатар энэ асуудалд анхаарлаа чиглүүлэх эсэх нь хамгийн сонирхолтой асуудал болж байна. Үг, үйлдэл нь зөрж, стандарт мартагдах уу. 

М.Жаргал