Нийгмийн бодлогын байнгын хорооны хуралдаанаар УИХ-ын гишүүн Б.Бат-Эрдэнэ дараах үгийг хэллээ. 

Тэрбээр "Болохгүй байгаа зүйлээ хэлээд өгөөсэй л гэж бид хүсэж байгаа шүү дээ. Яагаад ийм амархан юмыг ойлгохгүй, энд дарга царайлаад суугаад, бүх юм болоод байгаа юм шиг яриад байгаа юм бэ. Хаана болоод байгаа юм. Хөгжлийн бэрхшээлтэй хүмүүсийн амьдарч байгаа нөхцөл байдлыг хар л даа. Наад сэтгэл чинь өвддөггүй юм уу.

Би хөгжлийн бэрхшээлтэй биш. Миний удамд хөгжлийн бэрхшээлтэй хүн байдаггүй. Харин миний ээж нийгмийн халамжийн чиглэлээр насаараа ажилласан 70 гарсан хүн бий. Би хүүхэд байхаасаа орой болгон ажлаасаа ирээд шаналдаг ээжийнхээ шаналлыг мэдэрч өссөн. Том болоод хөгжлийн бэрхшээлтэй хүмүүсийн асуудалд анхаарал хандуулаад явж байсан. 

Гэвч төрийн албан тушаалтнууд муухай хатуу сэтгэлтэй. Бодлого шийдвэр гаргачих зүйл дээрээ гаргадаггүй. Өглөө ирж ажлын цагаа бүртгүүлээд орой явдаг. Хөгжлийн бэрхшээлтэй иргэд өөрсдөд нь хамаагүй юм шиг амьдардагт л миний уур хүрээд байна.

Та нар Нийгмийн бодлогын байнгын хорооны 21 гишүүнийг ашигла л даа. Яагаад болохгүй байгаа юм. Та нарын ажлыг бид үнэлээгүй шүү дээ.

Хөгжлийн бэрхшээлтэй хүмүүсийн төлөө ажиллах үүрэг хүлээгээд цалин аваад амьдарч байж, сэтгэл гаргах хэрэгтэй. Төрийн албан хаагч биш "хүн" гэсэн сэтгэлээр ажиллаад өгчих л дөө.

Бүх юмыг хууль эрх зүй рүү чихдэгээ боль л доо. Гудамжинд гараад явж чадахгүй байгаа хүүхдүүд, явж чадахгүй байгаа хүмүүс, дэлгүүрт ороод худалдаа эрхэлж чадахгүй байгаа хүмүүс, гэрээсээ гарч чадахгүй, гэртээ орж чадахгүй байгаа хүмүүсийг нэг удаа бод л доо. Ядаж тэтгэвэрт гарахаасаа өмнө үүнийг хийж дуусга л даа. Нүд амар байлгүй дээ ядаж" гэв. 

М.Гал