ЦЕГ-ын дэд дарга Ж.Амгалан "Монголчууд бид амьдралын хэвийн горимдоо буцаж орохын тулд сахилга баттай байх хэрэгтэй. Улаанбаатарын замын хөдөлгөөний нягтрал хөдөлгөөн 30 мянга орчим машинаар өнөөдрийн хувьд нэмэгдлээ. Энэ маш хор уршигтай. Замын уулзвар дээр цагдаагийн алба хаагчид ялгалт хийж байгаа. Үүнтэй холбоотойгоор түр зогсолт хийсэн. Цаашид хөдөлгөөний нягтралыг албадлагаар сийрэгжүүлэхгүй бол болохгүй байна. Цагдаагийн алба хаагчдын тавьсан шаардлагыг иргэд зөв ойлгож, онцын шаардлагагүй бол хөдөлгөөнд оролцохгүй байхыг хүсч байна. Автомашины болон иргэдийн хөдөлгөөнийг хязгаарлаж байж энэ өвчнийг хумих боломжтой гэдгийг иргэд ойлгох хэрэгтэй. Ажилдаа явах иргэд албаны үнэмлэхээс гадна, тухайн байгууллагаасаа энэ хүн ажиллах нь үнэн гэсэн албан бичигтэй байж хөдөлгөөнд оролцох боломжтой болно. 

Улаанбаатар өртөөнд өнөөдөр сэжигтэй нэг тохиолдол илэрсэн. Тэнд хамт ажиллаж байсан хүмүүсийг тусгаарлан шинжилгээнд хамруулах ажил үргэлжилж байна. Хариуг маргааш ЭМЯ-наас мэдээлнэ. Улаанбаатар хотод энгийн үед 450-480 мянган тээврийн хэрэгсэл автозамын хөдөлгөөнд оролцоно. Үүний 90 орчим хувийг нь хөдөлгөөнд оролцуулахаар яригдаж байгаа. Маргааш Засгийн газрын хуралдаанаар  ямар автомашиныг хөдөлгөөнд оролцохыг шийднэ.

Эмнэлэг, хилийн мэргэжлийнхэн, цагдаагийн алба хаагчид халдвар авах эрсдэл хамгийн өндөр гэсэн дүгнэлт гарсан. Тиймээс эрсдэлтэй албан хаагчдыг шинжилгээнд хамруулахад Сэлэнгэ аймгийн цагдаагийн нэг алба хаагчийн шинжилгээний хариу эерэг гарсан нь үнэн. Түүнийг тусгаарласан байгаа" гэдгийг тодотголоо. 

Б.Батчимэг