УИХ-ын дарга Г.Занданшатар гэр бүл, найз нөхдийн зүгээс цуглуулсан 20 сая төгрөгөө ХӨСҮТ-ийн хамт олонд хандивласан. Халдварын голомтод ажиллаж байгаа эмч, ажиллагсдын хувьд мэдээж урам зориг, бодит дэмжлэг болж чадсан.

Түүнийг зөв уриалга, үлгэрлэл үзүүлсэн гэж магтах хүн цөөнгүй. Учир нь өнгөрсөн хугацаанд зөвхөн иргэн, аж ахуйн нэгжүүд л өөрсдийн чадах чинээгээр УОК-т хандив цуглуулснаас “Их 76”-аас гар хөдөлсөн нь үгүй болохоор тэр шүү дээ. 

Харин гишүүн Ж.Ганбаатар овсгоотой байна. Даргынхаа хэлэх гээд байгаа санааг төвөггүй ухаж, бусдаасаа урьтаж хөдөлж чадлаа. Үүгээрээ тэр сайшаал харамгүй хүртэх нь гарцаагүй. 

Тодруулбал, “Оргил”-ын боссоор олноо өргөмжлөгдсөн тэрбээр хүнд цаг үед ажил үүргээ гүйцэтгэж байгаа Баянгол дүүргийн Цагдаагийн газрын нийт 350 алба хаагчдад өрх тус бүрт зориулж Оргил худалдааны төвөөс 50 мянган төгрөгийн бараа бүтээгдэхүүн худалдан авах эрхийн бичгийг хувиасаа дэмжлэг болгон өгчээ. Даргынхаа санааг хожуу ойлгосон болон сүүл мушгих гэж байгаа эрхэм нөхдүүд минь ийм л сэргэлэн байх хэрэгтэй шүү дээ. 

Цар тахлын үед нүдээ олсон дэмжлэгээс гадна, тойргоо усалж байгаатай ялгаа Юун. Ялангуяа халдвар голомтлон тархаж байгаа Дархан, Сэлэнгээс сонгогдсон гишүүд минь анхаарах хэрэгтэй. Тойргийн иргэдийнхээ итгэлийг хүлээж, төлөөлөл болж сонгогдсон биш үү. Үнэнийг хэлэхэд та хэд маань үнэндээ л чирэгдэж байна шүү.  

Б.Лхам