Цар тахлын үүссэн нөхцөл байдалтай холбогдуулан өндөржүүлсэн бэлэн байдлын хүрээнд 12 мянга гаруй алба хаагч үүрэг гүйцэтгэж байна. Замын хөдөлгөөнийг 90 гаруй хувиар бууруулах УОК-ын чиглэл гарсны дагуу тодорхой 13 чиглэлийн ажиллагсад өглөө 07.00-10.00, орой 17.00-20.00 цагуудад хөдөлгөөнийг зөвшөөрч, бусад үед хязгаарлаж буй.

Гэтэл үүргээ биелүүлсэн цагдаагийн үйлдэлтэй холбогдуулан өөрийг нь 30 гаруй минут шалгааж, явуулаагүй хэмээн “ялархаж”, “гомдоллож” буй гишүүн ёс зүйгүй байна. Та ч бас Монгол Улсын иргэн. Төрөөс гаргасан хууль, тогтоомж танд ч бас үйлчилнэ гэсэн үг. Ингэж л тайлбарлаж өгье.

Тодруулбал, өнөөдөр чуулганы нэгдсэн хуралдаанаар цар тахлын үед авч хэрэгжүүлж буй арга хэмжээтэй гишүүд танилцсан. Энэ үеэр УИХ-ын Г.Даминням “Зам дээр зогсож байгаа хууль сахиулах байгууллагынханд баярлаж байгаа.

Гэхдээ өчигдөр л гэхэд би Их Хурлын гишүүн хүн ордон дээр цуглах ажилтай гэж зарлагдаад очих гээд явж байх үед намайг зам дээр 30 минут зогсоосон.

Харилцаа болон ойртож байгаа байдал нь эрүүл аюулгүйн ямар ч зүйл хангаагүй” хэмээн салбарын сайдад нь гомдол мэдүүлэв.

Цагдагийн алба хаагч зөвхөн дээрээс өгсөн чиглэлийн дагуу эрх, үүргээ л биелүүлсэн төдий. Та дархан эрхтэй байж болох ч бүх нийтийн бэлэн байдлын үед авч хэрэгжүүлэх арга хэмжээ таниас гадуур өнгөрнө гэж хэн хэлээд байгаа юм бэ. Гишүүддээ хэлж ойлгуулаач, танхимын дарга аа.

Б.Лхам