Өчигдрийн чуулганы цахим хуралдаан өөрөө ч маргаантай болж, гишүүд нь ч будлиантай болголоо. Гишүүн Г.Дамдиннямын "матаас"-ыг дахин ярих илүүц биз. Харин гишүүн Х.Булгантуяа машин дотроосоо чуулганы хурхалдааныг явууллаа хэмээн баалуулаад авсан.

Тэрбээр үүнтэй холбоотой хийсэн тайлбартаа Улсын гуравдугаар эмнэлгийн гаднаас оролцсон бөгөөд тойрогт нь халдвар тархаж өндөр эрсдэлтэй байгааг тэмдэглээд тэнд иргэдийнхээ төлөө ажиллаж явснаа учирласан юм. Энэ асуудлыг ч яахав ойлгож болохоор. Ядаж л зураг үлдээгээд иргэдийг мэхлээгүй шүү дээ. Ийн хэлсний учрыг ч иргэд төвөггүй ухах биз ээ.

Гишүүн Ц.Мөнхцэцэгийг чуулганы хуралдаанд оролцож байгаа мэт иргэдийг хуурч зургаа үлдээгээд явсныг нь огцрох болзол ч гэж үзэх хүн цөөнгүй байгаа харагдана лээ.   

Энэ талаар тэрбээр цахим хуудастаа “Ер нь гэрээс онлайн хурал хийхэд хүүхэд, гэрийнхэн үймүүлэх явдал бишгүй байх юм. Тиймээс гишүүд үг хэлээгүй үедээ виртуаль зураг, цээж зургаа тавих эсвэл камераа хаах зэргээр бүтэн өдрийн чуулгандаа оролцож байгаа шүү” гэжээ.

Ийм л төрийн ажил, хувийн хэрэг хоёроо ч ялгаж салгах ухамсаргүй нөхдөд та бид их эрх эдлүүлжээ. Бидний төлөөлөл болж, хүсэл зоригийг минь илэрхийлнэ гэж сонгогдчихоод бүтэн өдөржин зураг харуулж биднийгээ хуураад яах вэ, гишүүн минь. Түүний хэлснээр бол бусад гишүүд ч ийм арга хэрэглэдэг юм байх.  

Энэ үнэн үү дарга Г.Занданшатар аа. Гишүүд чинь ингэж ёсзүйгүй авирлаж байгааг та мэдэж байв уу. Төрд хүндэтгэлгүй хандаж, төрийн хүчийг үнэгүйдүүлж байгаа хэрэг биш гэж үү. 

Б.Лхам