УИХ-ын чуулганы хуралдаанд Монгол Улсын Ерөнхийлөгч Х.Баттулга оролцож, үг хэлж байна.
Тэрбээр "Шүүх эрх мэдлийн нэр хүндийг аврах, хуульд захирагдан ажиллахыг шүүгчдээс шаардах нэн чухал болоод байсан. Энэ хүрээнд 2019 оны гуравдугаар сарын 25-нд төрийн бодлого гарсан.
ҮАБЗ-ийн хуралдаанаас гаргасан зөвлөмжийн дагуу шүүгчийн бүрэн эрхийн түдгэлзүүлж болох хуулийн төслийг УИХ хэлэлцэн баталсан. Энэ бол Монгол төрийн арга ядсан арга. Арга барсандаа хийсэн зүйл.
Энэ хууль батлагдсанаар хууль шүүхийнхэнд цочроо өгч, хэсэг хугацаанд ч болов шударга ажиллахыг хичээсэн. Гэтэл сүүлийн үед шударга сайхан байсан шүүхийн тогтолцоог нураасан юм шиг, илт мушгин гуйвуулсан үзэл суртлыг нийтэд түгээж байгаа нь эмгэнэлтэй санагдаж байна. ҮАБЗ шүүгчийн ур чадварыг үнэлдэг, халж сольдог өчүүхөн газар биш.
Өнгөрсөн хугацаанд 17 шүүгчийн бүрэн эрхийг түдгэлзүүлсэнтэй холбоотойгоор ҮАБЗ нэг удаа зөвлөмж гарсан. Бүрэн эрхээ түдгэлзүүлэн шалгуулсан зарим шүүгч нар зохих ялаа авсан. Үүнийг улс төржүүлэх хэрэггүй. Би өргөн мэдүүлсэн Шүүхийн тухай багц хуульдаа ҮАБЗ-ийн зөвлөмжөөр шүүгчийг халж, сольж болох талаар заалтыг оруулаагүй бөгөөд шүүх эрх мэдлийн хариуцлагыг эрс дээшлүүлэх бодлого зохицуулалтыг тусгасан. Харамсалтай нь МАН-ын бүлгийн шийдвэрээр миний санаачилсан хуулийн төслийг хэлэлцэхгүй байхаар шийджээ.
Монгол төрийн тэргүүний хувьд өмнөх Засгийн газрын өргөн мэдүүлсэн Шүүхийн тухай хуульд шүүмжлэлтэй хандаж байна. Нэг ёсондоо ухралт хийсэн, олон нийт, судлаач мэргэжилтнүүдээр хэлэлцүүлээгүй алдаа дутагдалтай, шударга шүүхийг хүлээж байгаа иргэдийн итгэлийг хөсөр хаясан хуулийн төсөл гэж дүгнэж байна. Тиймээс "Шүүхийн тухай багц хууль"-иудыг татан авч байна" гэв.
Б.Баатар
Сэтгэгдэл (2)