2020 оны УИХ-ын сонгуулиар Баянхонгор аймгаас  Г.Занданшатар, Д.Ганбат, А.Адъяасүрэн нарын эрхмүүд сонгогчдынхоо итгэлийг хүлээн гишүүнээр сонгогдсон. Харин Д. Ганбат, А.Адъяасүрэн нарын гишүүд өнгөрсөн хугацаанд дэндүү аминчхан гэдгээ харуулаад амжлаа.

Саяхны УИХ-ын чуулганаар зарим нэр төрлийн барааг буюу будаа, ургамлын тос, өвс, тэжээлийг Гааль, НӨАТ-ыг чөлөөлөх тухай хэлэлцэх үеэр Д.Ганбат гишүүн “Манай Баянхонгор аймагт долоо, найм хоног цас орлоо. Өвөлжилт түрүүчээсээ хүндэрч эхэллээ. Зуд боллоо. Нийт нутаг дэвсгэрт 5-30 см цас орсон байна.

2017, 2018, 2019 онд хуримтлагдан үлдсэн өвс, тэжээлийг  үнэгүй өгч болохгүй юу. Тэгэхгүй бол манай Баянхонгор аймгийн 12 мянган малчин өрх хүнд байдалд орох нь.

Нийт малчдын зургаан хувь нь юм. Нөхцөл байдал хүндэрвэл ядуурлын төвшин нэмэгдэнэ. Манай аймагт өвс тэжээл нэмж, олгохыг хүссэн Засаг даргын бичиг  та бүгдэд очсон уу. Үүнийг яаралтай шийдээд өг” хэмээн омогдож суусан. 

Тэгвэл хатагтай А.Адъяасүрэн гишүүн болсныхоо дараахан чуулганы хуралдаанд мөн л “Малчдын амьдрал хүнд байна. Ноолуурын үнэ өсөөгүй, гантай байснаас Баянхонгор аймгийн малчид зээлээ төлж чадахгүйд хүрлээ. Иймд Баянхонгор аймгийн малчдын зээлийн төлөлтөд уян хатан хандах, тусгайлсан мөнгөний бодлого хэрэгжүүлэхэд арилжааны банкуудад дэмжлэг үзүүлэх боломж байгаа юу” хэмээсэн нь  олныг гайхшруулсан билээ.

Д.Ганбат гишүүн манай аймгийн малчдад өвс, тэжээл үнэгүй өг хэмээн тулгаж суухад А.Адъяасүрэн гишүүн Баянхонгор аймгийн иргэдэд тусгайлсан мөнгөний бодлого хэрэгжүүлэхийг судал хэмээж суух.

Гишүүн бүр л манай аймаг, миний дүүрэгт өг, хүндрэлтэй асуудлыг нь шийд гээд чуулганы танхимд мундагдаад байвал төрийн бодлого боловсруулах гол үүргээ яах болж байна вэ. Өөрсдийг нь сонгосон  нутгийн зон  олноо гэсэн тэдний сэтгэлийг буруутгах аргагүй ч энэ мэтээр цааш үргэлжилбэл улс төрийн оноо авах гэсэн санаархалдаа дэндүү амтшаад эхлэх вий.

 У.Тэргэл