Засгийн газрын вакцин захиалгыг хариуцаж байгаа Сангийн сайд Ч.Хүрэлбаатар өчигдөр вакцины компанитай ярилцсан. Энэ талаар тэрбээр өөрийн цахим хуудастаа “Ерөнхий сайдын захирамжаар байгуулагдсан корона вирусний вакцины ажлын хэсэг улс орнууд, олон улсын банк санхүүгийн байгууллагууд, вакцин үйлдвэрлэгчидтэй цахим уулзалт, яриа, хэлцлүүдийг идэвхитэй хийж байна. Оксфордын Их сургуультай хамтран ажиллаж буй вакцин үйлдвэрлэгч Астразенека компанитай цахимаар хуралдаж вакцинжуулалттай холбоотой хийгдэж байгаа ажил, вакцин хөгжүүлэлттэй холбоотой ээлжит мэдээлэл солилцсон” гэдгээ тэмдэглээд цаашид хийгдэх ажлуудынхаа талаар товч тодорхой дурьдсан юм.

Гэтэл түүнтэй бараг зэрэгцээд шахуу Ерөнхийлөгч Х.Баттулга мөн тус компанитай ярилцсанаа мэдээлэв. Уулзалтаар Астразенека компанийн вакциныг нэн тэргүүнд худалдан авах хүсэлтэй байгаагаа илэрхийлсэн байна.

ҮАБЗ-ийн тэргүүн санаа тавих нь мэдээж зөв. Гэхдээ Засгийн ажлыг өмнүүр нь орж хиймээргүй байна. Нөхцөл байдал хүндэрсэн, жаахан л сэрэмж алдвал бүгдийг баллаж мэдэхээр байгаа энэ үед төрийн тэргүүний хувиар иргэдээ уриалж, Засгийн газрынхаа үйл ажиллагааг дэмжиж, тэдэнтэйгээ зөвлөлдөж, түмнийхээ “эцэг” шиг нь халамжилж, энэрмээр баймаар байна.

Ерөнхийлөгчийн сонгууль хаяа ойртож байна. Иргэд чинь тэнэг биш мэдэж байгаа. Хэн юу хийж, ярьж байгааг ойлгож байгаа.

Дотооддоо халдвар тархаасан гээд иргэд эрх баригчдыг зэмлэж, алдаа дутагдлыг нь ам булаалдан хэмлэж байх энэ цаг дор нэгнийхээ хийх ёстой ажлыг нь булаалдан дайрч урдуур нь зүтгэх биш өрөвч нигүүлсэнгүй хүн болж, тэднийгээ дэмжиж, иргэдээ бүхий л талаас нь уриалсан бол таны улс төрийн цаашдын карьерт их дэм болох байлаа.

Хийх ёстой ажлаа л хийе. Удахгүй иргэддээ өнгөрсөн дөрвөн жилийг хэрхэн үр бүтээлтэй өнгөрүүлсэн талаар тайлан тавина. Мэдээж хийсэн ажилтай байхгүй бол болохгүй. Таны энэ их хичээл зүтгэлийг ойлгож байна. Гэхдээ Улсын тэргүүн хүн байж сайд ноёдынхоо урдуур нь ороод байх тийм ч зохимжтой биш шүү дээ. Товчхондоо ийм байна, Ерөнхийлөгч өө.

Ядаж вакцин захиалахдаанэг цонхоор ажилламаар байна. Вакцин захиалга Ерөнхийлөгчийн сонгуулийн шоу болох учиргүй. 

Б.Лхам