Ерөнхийлөгч асан Ц.Элбэгдоржийн өнөөдрийн жиргээ олны анхаарлыг татав. Тэрбээр Монгол Улсын Ерөнхийлөгч Х.Баттулгад  хандан “Улс төрийн хоригдол 14 хүнд уучлал үзүүл.

Үндсэн хуулиар зөвхөн Ерөнхийлөгчид олгосон бүрэн эрх. Элдэв журам, тайлбараар шалтаглах хэрэггүй. Төрийн тэргүүний уучлалаас илүү хүчтэй эрх зүй гэж байхгүй. Хэлмэгдсэн, алдаж, эндсэн бусдыг нь 100 жилийн өршөөлд УИХ хамруулаг” хэмээн жиргэжээ.

Түүний улс төрийн хоригдол гэж нэрийдээд байгаа хүмүүс хэн бэ. Мэдээж улс төрд хариуцлагатай алба хашиж байсан эрхмүүд орно.

Шүүхээс ял сонссон, хорих ангид ялаа эдэлж буй гээд  үзвэл, С.Баяр, Ж.Эрдэнэбат, Д.Эрдэнэбат, С.Баярцогт, М.Энхсайхан, Да.Ганболд, Б.Болор, Б.Бямбасайхан, Н.Номтойбаяр, Д.Дамба-Очир, Г.Солтан, Б.Ариунсан нарыг нэрлэж болох юм.

Ерөнхийлөгч асан Ц.Элбэгдоржийн жиргэснээр бол, энэ мэт 14 хүнд уучлал  үзүүл. Төрийн тэргүүний хувьд тань олгосон бүрэн эрхээ хэрэгжүүл. Харин элдэв шалтаг тоочих хэрэггүй хэмээн үгээ дайжээ.  Түүний хувьд өөрийнх нь улс төрийн хоригдол хэмээн нэрийдээд байгаачлан авлига, албан тушаалын хэрэгтээ шүүхээс ял сонссон Ерөнхийлөгч асан Н.Энхбаярт уучлал үзүүлж байлаа.

Монгол Улсын Ерөнхийлөгч Х.Баттулга саяхан чуулганы индэр дээрээс “Айлын цонхоор орж 50 мянган төгрөг хулгайлсан залуу, баавгайн арьс, савар авч яваад  шоронд орсон энгийн иргэд уучлал хүсч байх жишээтэй” хэмээн онцолж байсан.

Үүнээс харахад уучлал үзүүлэх бололтой. Харин дээрх 14-ийг багтаах болов уу.

Төрийн тэргүүний хувьд Х.Баттулгад бүрэн эрх нь бий. Гагцхүү Ц.Элбэгдоржийн нарийвчлан тоог заасан хүмүүс, тэр дундаа улс төрийн хоригдлуудад уучлал үзүүлэх эсэх нь ихэд эргэлзээтэй юм. Ямартай ч, эрхийг нь сануулж, хүчээ үзүүлэхийг экс Ерөнхийлөгч одоогийн Төрийн тэргүүнээс шаардлаа.

У.Тэргэл