Засгийн газрын ээлжит хуралдаан өнөөдөр болж, хуралдаанаас гарсан шийдвэрийг танилцуулж байна.

Монгол Улсын Ерөнхий сайд У.Хүрэлсүх сайжруулсан түлшний үнийг дөрөвдүгээр сарын нэгний өдрийг хүртэл 50 хувиар буулуулах шийдвэр гаргасан гэдгээ дуулгалаа. Энэ нь цар тахлын үед иргэддээ үзүүлж байгаа дэмжлэг гэдгийг тэрбээр онцлов.  

УОК-ын дарга, Шадар сайд Я.Содбаатар "Зургаан аймаг, Улаанбаатар хотод Засгийн газрын нөөц хөрөнгөөс 3 тэрбум төгрөгийн дэмжлэг үзүүлэхээр шийдвэрлэлээ. Цар тахалтай холбоотойгоор төлөвлөөгүй зардал ихээхэн гарсан тул ийнхүү санхүүгийн дэмжлэг үзүүлэхээр болж байна.

Засгийн газраас коронавирус дотооддоо тархсанаас үүдэж, 23 төрлийн арга хэмжээг хэрэгжүүлж байгаа. Үүнтэй холбоотойгоор зарим хуулийн төсөлд өөрчлөлт оруулах шаардлага гарч байна.

Цар тахлын үед гэр хорооллын иргэдэд дэмжлэг үзүүлэх зорилгоор 220 гаруй мянган өрхөд сайжруулсан түлшийг 50 хувийн хөнгөлөлттэй үнээр буюу нэг тонныг нь 75 мянган төгрөгөөр худалдаална. Уг хөнгөлөлт маргаашаас буюу арванхоёрдугаар сарын 3-ны өдрөөс дөрөвдүгээр сарын 1-н хүртэл үргэлжилнэ.

Коронавирусний халдвар дотоодод тархсанд хяналт тавин ажиллаж байна. Коронавирусний эрсдэлтэй гэж үзэж байгаа найман цэгт хяналтын баг гаргаж ажлуулахаар болсон. Тодруулбал ХӨСҮТ, цэвэрлэх байгууламж, тусгаарлах байр, авто замын боомт зэрэгт хяналт тавина" гэв. 

Б.Батчимэг