Засгийн газрын хуралдаанаас жижиг, дунд үйлдвэрлэл эрхлэгчдээ дэмжсэн тодорхой арга хэмжээ авах болов уу гэсэн хүлээлт үүсээд удаж байна. Өнөөдрийн хуралдаанаас энэ талд ямар шийдвэр гарсан талаар Шадар сайд Я.Содбаатар “ Засгийн газар, хувийн хэвшил, аж ахуйн нэгж гээд хаа хаанаа хөрөнгө мөнгөний асуудал хүндрэлтэй байна. Өнгөрсөн хоёрдугаар сараас 5,1 их наяд төгрөгт дүйцэхүйц тодорхой арга хэмжээ авч ирсэн. Одоо ч үргэлжлүүлж байна. Хөрөнгө мөнгө байвал харамлаад дараад байх зүйл алга. Тиймээс шат дараатай арга хэмжээг аваад явж байна. Тухайлбал, түрээсийн төлбөрөө бууруулсан  эсвэл бүр цуцалсан аж ахуйн нэгжийг орлогын албан татварыг хөнгөлөх, татвараас чөлөөлөх хуулийн төслийг өнөөдөр өргөн барьж байна. Мөн татвар төлөөгүйгээс үүсэх алдангаас  чөлөөлөх шийдвэрийг өнөөдөр   гаргалаа. Өдрийн орлогоороо амьдардаг иргэн олон. Ойлгож байгаа. Гэхдээ цар тахлын энэ үед Засгийн газар, УИХ шат дараатай арга хэмжээ цаашид аваад явах болно. Нөөц боломж хязгаарлагдмал байгаа. Хий хоосон мөнгө хэвлээд, эсвэл амлаад байж болохгүй” гэлээ. 

У.Тэргэл