Улс төрийн өндөр албан тушаалтнуудтай холбоотой хэргийн Давж заалдах шатны хуралдаан энэ өдрүүдэд болж байна. Хэдийгээр хатуу хөл хорионы үе ч гэлээ шүүгдэгчдийн заримынх нь бие тааруухан байгаа бол сэхээн амьдруулах тасагт хүргүүлсэн нь ч бий.

Тиймээс хэргийг нэг тийш яаралтай шийдвэрлэхгүй бол хүний амь нас эрсдэх нөхцөл байдал үүсээд байна.

Үүний зэрэгцээ албан тушаалтнуудтай холбоотой хэргийг шүүсэн анхан шатны шүүгчдэд хариуцлага ногдуулах ёстой. Тэд бусдын нөлөөнд автаж, хараатаар шийдвэрээ гаргасан гэх шүүгдэгч, өмгөөлөгчдийн гомдол холбогдох байгууллагуудад олноор иржээ.   

Шударгаар шүүлгэх эрхийн дотор нэг чухал агуулга байдаг нь “Шүүхийн шийдвэр биелэгдэхүйц байх ёстой” гэсэн зарчим аж. Огт биелэхгүй нөхцөл тавих нь өөрөө шүүхийн шийдвэр шударга бус байгааг харуулж байгаа хэрэг хэмээн Хууль зүйн сайд асан, хуульч Х.Тэмүүжин хэлж, шүүгчид утсан хүүхэлдэй байж болохгүйг сануулж байна.

Шүүхийн шийдвэр биелэгдэхүйц байх ёстой зарчмыг мэдсээр байж зөрчсөн шүүгчид  хариуцлага тооцож байж дахин ийм явдал гаргуулахгүй.

Монголын нөхцөлд жирийн иргэний дандаж цалин, орлого хэд билээ. Гэтэл огт биелэх боломжгүй буюу батлан даалтад гарахаар бол 2-10 тэрбумыг төл. Үгүй бол шоронд ор гэдэг харгис шийдвэрээ тулгаж байгаа шүүгч эрүү шүүлт тулгаж байна гэсэн үг аж.

Мэдлэг нь дутсандаа бус мэдсээр байж ийм завхрал гаргаж байгаа шүүгчийг албан тушаалаас нь огцруулж, зайлуулж байж шүүхийн байгууллага цэвэршинэ. Тэгвэл анхан шатны шүүхийн хэн гэгч шүүгч биелэх боломжгүй шаардлага тулган барьцааны мөнгийг хэдэн тэрбумаар нь нэхсэнийг эргэн сануулъя.

- Ж.Эрдэнэбат,  С.Баярцогт, Да.Ганболд нараас 10 тэрбумын барьцаа нэхсэн

-С.Баяр нарын долоон хүнд холбогдох хэргийг шүүхдээ Ерөнхий сайд асан С.Баяраас таван тэрбумын барьцаа нэхсэн ч 525 сая төгрөг өгч байж батлан даалтад гарсан.

-Б.Бямбасайханаас хоёр тэрбумыг нэхсэн байдаг.

Тэгвэл Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн шүүгч Х.Идэр, Ё.Цогтзандан нар шүүгдэгчдээс ингэж олон тэрбумаар нэхэж, даажигнасан байдаг юм. Тэгвэл ямар хариуцлага хүлээлгэх вэ. Шүүгчийн ёс зүйн хороо, Шүүхийн ерөнхий зөвлөл шүүхийн шийдвэр биелэгдэхүйц байх ёстой гэсэн зарчмыг илт зөрчин олон тэрбумаар нь нэхсэний цаана хэний ашиг сонирхол байв. Шүүгчид ийм эрх нь бий юү гэх олон асуудлыг шалгаж эцэслэх шаардлагатай байна.

У.Тэргэл