Монголын Сагсан бөмбөгийн холбооны Үндэсний дээд лигийн Хасын Хүлэгүүд баг Зүүн Азийн Супер Лигийн (EASL) 2025–26 оны улирлын хүрээнд “C” хэсэгт Япон, Солонгос, Тайванийн багуудтай өрсөлдөж байна. Тэд энэ удаад 11-р сарын 01-ний өдөр Тайванийн New Taipei Kings багийг нутагтаа хүлээн авч, тоглолтын үндсэн цагт 90:76 харьцаатайгаар буулган авч, M bank arena-д цугласан үзэгч, хөгжөөн дэмжигчидтэйгээ ялалтын баяраа тэмдэглэлээ.

Хэдийгээр New Taipei Kings баг туршлагатай тоглогчдоор хүчээ зузаатган, ширүүн өрсөлдөөн үзүүлсэн ч талбайн эзэн баг болох Хасын Хүлэгүүдийн нэгдмэл байдал, хүчирхэг довтолгоонууд, хүчтэй хамгаалалтын системыг буулган авч чадсангүй.

Тоглолт Улаанбаатар хотод “M bank arena”-д олон мянган үзэгчдийн дунд өрнөж, талбайн эзэн баг тоглолтын эхний үеэс хэмнэлийг гартаа авч, довтолгоо болон хамгаалалтад илүүрхсэн тоглолт үзүүллээ. Багийн гол тоглогчид онцгой тоглолтуудыг үзүүлсэн бөгөөд, тэр дундаа Хүлэгүүд багийн тоглогч Иан Миллер 40 оноо авч өөрийн ур чадвараа дахин батлан харуулсан нь тоглолтын оргил мөч болж чадлаа.

Энэ ялалтаар Хасын Хүлэгүүд “C” хэсэгтээ чухал оноо авч, хэсгийн тоглолтуудад 2-0 амжилттайгаар цааш үргэлжлүүлэх бөгөөд, EASL-ийн хүрээнд нутагтаа хүлээж авах дараачийн тоглолт нь 11-р сарын 05 өдөр БНСУ-ийн “Changwon LG Sakers” баг байх юм. Энэхүү тоглолт нь Хасын Хүлэгүүд багийг цааш шалгарахад хамгийн чухал нөлөөтэй тоглолт бөгөөд тухайн тоглолтыг хожсон тохиолдолд хэсгээс гарах үүд хаалга нээгдэх юм.