УИХ-ын танхимд “Зөвхөн тэр аймагт зориулж” гэх үг трэнд болох нь. Ер нь зөвхөн Баянхонгор аймагт зориулж бодлого хэрэгжүүлж болох уу,  түшээд ээ. Баянхонгороос сонгогдсон нэр бүхий гишүүд асуугаад байна. Хариулт өгөөч гээд асуучихмаар байна.

Өнгөрсөн зун хэд хэдэн аймагт зуншлага муу болсноос өвөлжилт хүндрэх төлөв ажиглагдаж буй. Тухайлбал, дан ганц Баянхонгор аймаг ч биш Өвөрхангай, Говь-Алтай болон говийн аймгуудад ч нөхцөл байдал хүнд байна.

Гэтэл зөвхөн манай аймаг гэж яриад байгаа чинь утгагүй сонсогдоод байна, гишүүд ээ.

Тодруулбал, УИХ-ын гишүүн Д.Ганбат “Баянхонгор аймагт нөхцөл байдал маш хүнд байна. Малын өвс, тэжээлээ Баянхонгор аймгийн малчдад зээлээр өгчих” гэх юм билээ. Уг нь бол өөр хэд хэдэн аймагт ч өвөлжилт хүндэрч байгаа учраас энэ хэдэн аймгуудад гэж хэлсэн бол.

Ер нь Баянхонгорчууд бидэнд зориулж тусгай бодлого хэрэгжүүлэх боломж байна уу. Гишүүн минь та санал гаргаадхаарай гэдэг юм болов уу. Эсвэл сонгогдсон гишүүд нь тойрогтоо тусгай бодлого хэрэгжүүлж гоё харагдах гээд байдаг юм болов уу.  

Өмнө нь хүртэл тус аймгаас сонгогдсон гишүүн А.Адьяасүрэн “Баянхонгор аймгийн малчдын зээлийн төлөлтөд уян хатан хандаж, тусгайлан мөнгөний бодлого хэрэгжүүлэхэд арилжааны банкуудад дэмжлэг үзүүлэх боломж байгаа юу” гэж асууж олны тохуу болж билээ.

Б.Лхам