Өчигдөр УИХ-ын чуулганаар гуррил, будаа, ургамлын тос, өвс, тэжээлийг НӨАТ, гаалийн албан татвараас чөлөөлөх хуулийн төслийн нэгдүгээр хэлэлцүүлгийг хийлээ. Энэ үеэр гишүүдийн зүгээс хэд хэдэн аймгуудад зуншлага муу болсноос мал тарга тэвээргээ авч чадаагүй. Өвөлжилт хүндрэх төлөвтэй байгаа бөгөөд малын өвс, тэжээлийн үнэ нэмэгдэж, хомсдол үүссэнээс малчдын байдал төвөгтэй болж байгаа талаар онцолсон юм.

Тиймээс УИХ-ын дарга Г.Занданшатар онцгой үеийн байдлыг далимдуулж өвс, тэжээлийн үнийг нэмэгдүүлж байгаа энэ явдалтай тэмцэж хариуцлага тооцож, горимд нь оруулахыг ШӨХТГ-ын дарга Б.Бат-Эрдэнэд санууллаа.

Цахим сүлжээнээс үзэхэд цар тахлын үед үнээ нэмэгдүүлсэн аж ахуйн нэгжүүдтэй тэмцэж, ШӨХТГ “онц” ажиллаж байгаа хэмээн иргэд ам сайтай байдаг. Зарим нь О.Магнайгаас хойш амьгүй болсон газрыг амь оруулсанд нь талархаж байгаа харагдана лээ.

Таны дараагийн “дайл”-аар мордох газар малчид руу чиглэх нь. Энэ эрчээ алдалгүй ажиллахыг танд дайя.

А.Сүх