Хууль зүй, дотоод хэргийн сайд Х.Нямбаатар саяхан өөрийн цахим хуудаснаа коронавирусний хажуугаар улс төрийн вирус хяналтгүй тархсан, тэр ч бүү хэл вирус мутацид орж, зомбинуудыг амилуулж байгаа гэх учир битүүлэг, хачирхалтай зүйл нийтэлсэн нь олны анхаарлыг татаж, басхүү шүүмжлэл дагуулаад байна.

Тодотговол Х.Нямбаатар сайд "Корона вирусын хажуугаар Монголд улстөрийн вирус хяналтгүй тархчихсан хүндхэн байдалтай байна. Зарим нэг нэр бүхий вирус мутацид ороод зомбинуудыг амилуулан Монголыг минь хордуулаад байх юм. 2021 онд аль альнаас нь салах боломж бий" хэмээн бичжээ. 

Түүний ийн өгүүлсэн улс төрийн вирус хэн бэ, Хууль зүйн сайд мутацид орж амилуулсан гэх зомбинуудаар хэнийг нэрлэв, 2021 онд аль альнаас нь салах боломж бий гэсэн нь ямар утгатай үг вэ гэгчлэнгээр таамаг мэдээлэл цахим орчинд хөвөрч байна.

Тодруулбал, улс төрийн вирусээс 2021 онд салах боломжтой гэхээр Ерөнхийлөгчийн сонгуулийг хэлж, Х.Баттулгаас салах боломжтой гэдгийг ийн илтгэсэн байх магадлалтай гэжээ. Үнэндээ 2021 онд Ерөнхийлөгчийн сонгууль л болох учиртай. Одоогоор үүнээс өөр мэдэгдэж буй улс төрийн томоохон сонгууль байхгүй.

2021 оны Ерөнхийлөгчийн сунгаанд МАН У.Хүрэлсүхийг, АН Х.Баттулгыг сойж буй гэх шум газар аваад байгаа билээ. Тиймээс ч Х.Нямбаатар сайд Ерөнхий сайд У.Хүрэлсүхээ дэмжиж ийн өгүүлсэн байх магадлалтай юм.

Тэгвэл Х.Нямбаатар сайдын нэрлэх зомбинууд хэн бэ. Бас л анхаарал татсан сэдэв. Магадгүй түүний хэлсэн зомбигоор Ерөнхийлөгч асан Ц.Элбэгдоржийг гэж нэрлэх хүн олон байна.

Тэрбээр хэдхэн сарын өмнө Ардчилсан намын гишүүнчлэлээ сэргээсэн. Мөн саяхан Ерөнхийлөгч Х.Баттулгад хандан, 14 улстөрийн хоригдолд уучлалт үзүүлэх ёстой гэх мессежийг илгээж, олны анхаарлыг татсан нь ийн нэрлэхэд хүргэв үү гэх “бор шувуу” ч нисч эхэлжээ.

Ямартай ч Хууль зүй, дотоод хэргийн сайд Х.Нямбаатарын учир битүүлэг нийтлэл олны анхаарлыг татаж, төрөл бүрийн таамгийг цахим орчинд хөврүүлж байна. Тэрбээр энэ талаар ямар нэгэн тайлбар хийж, хэнийг нэрлэсэн гэдгээ ч шулуухан хэлэх байх гэдгийг ч хүлээх хүн олон байгаа юм.

Б.Баатар