Монгол Улсын Ерөнхийлөгч Х.Баттулга УИХ-ын дарга болон МАН-ынханд хандаж, гомдлын үг “чулуудлаа”. Тэрбээр УИХ-ын дарга Г.Занданшатарт албан бичиг хүргүүлж, хоёр жилийн өмнө УИХ-д өргөн мэдүүлсэн хуулийн төслөө хэлэлцэн, батлаж өгөхийг хүсэв.

Ингэхдээ  “Валютын зохицуулалтын тухай хуульд нэмэлт оруулах тухай хуулийн төслийг өргөн мэдүүлээд хоёр жил хоёр сар орчмын хугацаа өнгөрлөө. Өнгөрсөн хугацаанд өргөн мэдүүлсэн хуулийн төслийг нь "тоохгүй" болохоор албан бичиг хүртэл хүргүүлж байсан хэмээжээ.

Харамсалтай нь уг хуулийн төслийг эцэслэн батлах, амьдралд хэрэгжүүлэх чиглэлд УИХ-ын гишүүдийн зүгээс идэвх санаачилга гаргаагүй, арга хэмжээ огт аваагүй бөгөөд цаашид ч энэ байдал үргэлжлэх шинжтэй байгаа учир ийнхүү "гомдол" мэдүүлж, УИХ-ын даргад ханджээ.   

Монгол Улсын Ерөнхийлөгч Х.Баттулга “Валютын зохицуулалтын тухай хуульд нэмэлт оруулах тухай хуулийн төсөл”-ийг баталсанаар улс орны хөгжил, эдийн засагт үнэмлэхүй хувь нэмэртэй, голлох нөлөөтэй байгаа ашигт малтмал, уул уурхайн салбарт гарч буй хүндрэл, бэрхшээлийг шийдвэрлэн урагшлуулах боломжуудын нэг бөгөөд хуулийн төслийг хурдан шуурхай баталж, хэрэгжүүлэхэд анхаарч ажилласан бол ард иргэдийн амьдралд асар хүнд дарамт, бэрхшээл болоод удаж буй ам.долларын ханшийг тогтоон барих, бууруулах чиглэлд онцгой ахиц дэвшил гаргах байсан" гэж үзэж байгаа аж.

Түүнчлэн Ерөнхийлөгч Х.Баттулга албан бичигтээ “Санаачилсан хуулийн төслийг улс төрийн шийдвэр гаргаад хэлэлцэхгүй болгодог, эсвэл чадан ядан дэмжүүлсэн хуулийн төслийг нь батлахгүй дардаг, цар тахлын гамшиг нүүрлэсэн энэ хүнд үед иргэдээ дэмжсэн, хэмнэлттэй, үр ашигтай төсвийн бодлого юу юунаас илүү чухал байгааг сануулж шаардахад элдэв шалтаг, шалтгаан тоочин эсэргүүцдэг байдалдаа Монгол Ардын нам, түүний гишүүдээс олонх нь бүрдэж байгаа УИХ нухацтай дүгнэлт хийж, анхаарах хэрэгтэй байна” хэмээн МАН-ынханд "сануулга" өгчээ. 

Б.Баатар