Ирэх даваа гарагаас буюу арванхоёрдугаар сарын 14-ний өдрөөс Гамшгийн бэлэн байдлын зэргийг сулруулж, өндөржүүлсэн бэлэн байдлын зэрэгт шилжих шийдвэр гарсан. Ингэснээр одоогийн ажиллаж буй 18 чиглэлийн аж ахуйн нэгж дээр нэмж, 34 чиглэлийн байгууллагын үйл ажиллагаа хэвийн горимд шилжихээр болсон.

Цар тахлын нөхцөл байдал амаргүй байгаа ч эдийн засаг элгээрээ хэвтэх хүндрэл үүсээд буй учир эрх баригчид “нүд аниад” л эл шийдвэрийг гаргах шиг боллоо.

ДЭМБ-аас манай улсыг коронавирусний халдварын өндөр эрсдэлтэй улс орон гэх жагсаалтад багтааж, ЭМЯ-наас хөл хориог цуцалвал, халдварын тохиолдол, хоёрдахь давалгаа дөрөв, тавдугаар сард хамгийн дээд цэгтээ хүрэх хандлага ажиглагдаж байна гэдгийг мэдэгдсэн.

Тодотговол Эрүүл мэндийн сайд Т.Мөнхсайхан "Улаанбаатар хотод энэ сарын нэгнээс өвчлөл буурч байсан боловч долоонд 32 тохиолдол бүртгэгдэж, эргээд халдварын тохиолдол нэмэгдэх хандлага ажиглагдаж байна. Ковид-19-ийн тархалтын динамик зураглалаар энэ сарын 11-ний өдөр хөл хориог цуцалвал 2021 оны нэгдүгээр сард халдварын нууц үед байгаа хүний тоо өсч, халдварын нийт тохиолдлын тоо дөрөв тавдугаар сард хамгийн дээд цэгтээ хүрэх хандлага ажиглагдаж байна. 

Харин Сэлэнгэ аймагт энэ сарын сүүлчээр халдвар авсан хүний тоо огцом нэмэгдэж, үүний улмаас 2021 оны хоёрдугаар сард эмнэлэгт хэвтэн эмчлүүлэгчдийн тоо оргил үедээ хүрч болзошгүй дүр зураг харагдаж байна. Өөрөөр хэлбэл халдварын хоёр дахь давлагаа эхлэх магадлал байна" хэмээсэн юм.

Тиймээс ч Засгийн газар хөл хориог бүрэн цуцлаагүй бололтой. Гэхдээ сулруулах шийдвэр гаргалаа.

Монголчууд хэнэггүй зантай улс гэдэгтэй хэн ч маргахгүй байх. Гамшгийн бэлэн байдлын зэрэгт шилжсэн эдгээр өдрүүдэд ямар дүр зурагтай, дүрэм журамтай, дэглэм сахиж байгаа билээ.

Хүн болгон л хэлж, халаглаж байгаа. Тэгэхээр энэхүү зэрэглэлийг бууруулахаар нөхцөл байдал яаж, хэрхэн эргэх нь ч эргэлзээ төрүүлж, басхүү айдаст автуулж байгаа нь нууц биш.

Даваа гарагаас 52 чиглэлийн 282 мянган ажлын байр нээгдэж, үйл ажиллагаагаа хэвийн явуулж эхэлнэ. Эдгээрийн халдвар хамгааллын дэглэмийг мөрдүүлэх, иргэд өөрсдийн ухамсараар хариуцлагатай хандах нь хамгийн чухал гэдгийг албанхына хэлж, сануулж буй. Эрсдэл ойрын байгаа.    

Б.Баатар