Эрүүл мэндийн сайд асан Д.Сарангэрэлийг азтай, одтой  гэх үү харин монголчууд бид хувь заяатай гэх үү. Дэлхий нийтэд тархсан цар тахалтай холбоотойгоор Монгол Улс ч гараа хумхин суугаагүй. Иргэдээ эрсдлээс сэргийлэхийн тулд төр, засаг бүхий л арга хэмжээг авч ирсэн ба талархах хүмүүс нь гол цөмд нойр, хоолоо умартан ажилласан ХӨСҮТ-ийн хамт олон юм.

Гэтэл энэ олон хүний гавьяа, зүтгэлийг өөртөө нааж, “Ковид-19”-ийг дотооддоо алдаагүйнхээ төлөө “Төрийн хатан эрдэнэ”-ээр хүртэл өргөмжлөгдөөд амжсан хүн нь Эрүүл мэндийн сайд асан Д.Сарангэрэл юм. Өргөмжлөлийн утга агуулгыг эрхэм сайдын дүр эсгэн шуодаж ирсэн он жилтэй харьцуулбал  ихээхэн зөрүүтэй. “Ковид-19”-тэй тэмцэхэд салбараа манлайлан ажилласан. Монголын төр асрангуй, энэрэнгүй, ард түмэндээ ачлалтай, энэрэлтэй байхын бэлгэ тэмдэг болсон хэмээн тодотгосон байдаг.  Өмнөөс нь ичих ч хэцүү ийм байдалд олон хүнийг оруулсан билээ.

Д.Сарангэрэл сайдын хувьд мэдээж, мэргэжлийн бус хүн анагаах ухааны энэ том салбарыг удирдан чиглүүлэхэд хүндрэлтэй. Гэвч тэрбээр баг, хамт олондоо дөрөөлөн шоудаж, өөрийгөө рекламдан, эцсийн эцэст хатнаар өргөмжлөгдөн, сайдаас сайдын суудал руу шилжсэн азтай, одтой нэгэн юм.

Харин  монголчууд  бид хувь заяатай гэдгийн учир нь, халдварыг дотооддоо алдсан энэ хүнд цагт мэргэжлийн хүн нь салбараа удирдан авч яваа нь олзуурхууштай. Ядаж л салбарынхаа жаргал зовлонг мэдэрдэг, мэддэг, салбартаа үнэлэгдсэн, залуу хүн. Дээр нь томоохон эмнэлгүүдийг толгойлж ирсэн, анагаах ухааны магистр, докторант, клиникийн профессор юм.

Эрүүл  мэндийн салбарынхан сая л нэг амьсгаа авч,  мэргэжлийн хүнийг сайдаар нь томилсонд талархсан билээ. Үгүй бол, байдал өнөөдөр ямар хэмжээнд байхыг хэн ч хэлж мэдэхгүй юм.

Эрүүл мэндийн сайд Т.Мөнхсайханы хувьд өнөөдрийг хүртэл хаа хаашаа савласангүй, гомдож тунирхсангүй, өмнөх ажлаа л сайн хийхийг хичээж сууна. Түүнд цар тахлыг тогтоон барихаас гадна нэг том зовлон байгаа нь өмнөх сайдынхаа  шавар шалбааг цэвэрлэх юм. Өнгөрсөн арван сард эрүүл мэндийн салбар юу хийв. Халдвар хамгааллын дэглэмийг сахиулах сургалтыг муу хийснээр олон эмч, ажилтан халдвараар өвчлөөд байна. Дотооддоо халдвар тархвал ямар арга хэмжээ авах, хүн амын төдөн хувь нь өвчилсөн тохиолдолд ямар эрсдэл гарах, хэрхэн даван туулах заавар,нарийвчилсан судалгаа байна уу. Энэ бүхнийг өнгөрсөн хугацаанд нарийн тооцож гаргасан байх ёстой биз дээ гэсэн олон асуулт тулгалтад  Т.Мөнхсайхан сайд өнөөдөр ээрэгдэж сууна.

Хатуугаар хэлбэл, гавьяаг нь Д.Сарангэрэл сайд үүрч, гайг нь Т.Мөнхсайхан сайд эдэлж явна.

Гэвч тэрбээр залуу туршлагатай боловсон хүчин, мэргэжлийн хүний хувьд даваад гарах нь тодорхой. Харин Д.Сарангэрэл сайдын хувьд арван сар энэ салбараар тоглон, хүүгийнхээ найз нөхөд, албан тушаалтнуудын ах, дүүг яамны даргаар томилж, тал зассанаас илүүг хийж чадаагүй.

АТГ-аас энэ асуудлыг шалгаад ашиг сонирхлын зөрчлийн улмаас хууль бус томилгоо хийснийг нь тогтоочихоод байхад “Ардын хүүхдийг ажилд авч болдоггүй нийгэм юм уу” хэмээн намжирдаж суусан билээ.

У.Тэргэл