Шинэ парламент байгуулагдаад хагас жилийн хугацаа өнгөрч байна. Хэд хэдэн онцлогтой бүрэлдсэний нэг нь ахмад настнуудаа “тэтгэвэр”-т нь гаргасан явдал юм. Мөн улс төрийн нам нэгээр нэмэгдэж, дахин нэг бие даагч ялалт байгуулж чадсан гээд нэрлэвэл олон.

Дахин нэг содон өнгө нь өнгөрсөн парламентад МАХН-аас нэр дэвшиж, АН руу урвасан О.Баасанхүүгийн орыг ХҮН-ын Т.Доржханд залгасан явдал. Иргэд ингэж ярьдаг юм. Ялгаа нь гэвэл Т.Доржханд гишүүн арай судалгаатай ярихаас гадна мэдлэгийн хувьд илүү харагддаг. Гишүүн асан О.Баасанхүүгийн тухайд гэвэл Орхон аймагт Ц.Нямдорж, С.Ганбаатар нартай учраа таарч хуучин намын нөхөртөө "өвдөг шороодсон"-ыг уншигчид мэднэ.

УИХ-д дахин дэвшээд унасан тэрбээр өдгөө гишүүн С.Ганбаатарт шадарлаж байгаа гэх яриа гараад буй.

Тэгвэл энэ талаар УИХ-ын гишүүн С.Ганбаатар парламент телевизэд өгсөн ярилцлагадаа О.Баасанхүүтэй хамтран Орхон аймгийн иргэддээ туслахаар цаг алдалгүй ажиллаж байгааг онцолж, дээрх яриа үнэний ортойг батлав. Хүнд үед намаа орхисон О.Баасанхүүтэй МАХН яагаад дахин хамтрах болов.

Ер нь МАХН-аас сонгогдсон хэрнээ сонгуулийн өмнөхөн намаа орхиж, АН-тай гар барьсан нь олон иргэдийн дургүйцлийг хүргэсэн дамжиггүй. Магад сонгуульд ялагдал хүлээх болсон гол шалтгааны нэг нь ч энэ байж болох юм.

Өнгөрөгч сонгуулиар АН 45 суудал авах зорилготой ажилласан ч 100 саяын дэнчин нь намаа хөөдөж орхисон. Үүнээс гадна О.Баасанхүүг намдаа элсүүлж, 100 саяын дэнчингээ авахгүй байхаар тохиролцож сүржин урьж залсан ч тэр нь амжилт үзүүлээгүй. Иймээс одоо тэр АН-д хэрэгцээгүй хүний нэг гэсэн үг. Гэлээ гэхдээ АН-ын гишүүнчлэлээс татгалзлаа л гэж сонсогдоогүй. Гэвч хуучны журмын нөхөртэйгөө дахин сүлбэлдэлж эхэлснээс нь харахад түүний энэ үйлдэл МАХН-ыг түших гэж байгаа хэрэг үү хэмээн харагдахаар байна. 

А.Сүх