"Шүүхийн тухай багц хууль"-ийг УИХ эдгээр өдрүүдэд хэлэлцэж буй. Монгол Улсын Ерөнхийлөгч болоод Засгийн газраас эл хуулийн төслийг өргөн мэдүүлсэн ч Ерөнхийлөгч “Шүүхийн тухай багц хуулийн төсөл хэт их улстөржсөн, төрийн уламжлалд үл зохицох байдлаар явж буйд харамсч байна. Тиймээс Шүүхийн тухай багц хуулийн төслүүдээ татаж авч байгаагаа албан ёсоор мэдэгдэж байна” хэмээгээд хуулийн төслөө татан авсан билээ.

Улмаар Засгийн газраас өргөн мэдүүлсэн хуулийн төслийг хэлэлцэж байгаа юм. Харин тус хуулийг төслийг зарим улстөрчид төдийлөн сайшаахгүй, шударга бусын хогил улам бэхшиж, ноёрхох боломж бүртэх нь, тэр бүү хэл, эрх баригчид мафийн толгойлогч нараа суллахаар тус хуулийг батлахаар улайрч байна гэх байр сууриудыг илэрхийлээд байна.

Тодотговол, УИХ-ын гишүүн  С.Ганбаатар “Шүүхийн багц хууль ард иргэдийнхээ сайхан амьдрах боломжийг хулгайлдаг цагаан захтануудыг ялгаварлахгүйгээр шүүдэг байх боломжийг л олгох ёстой. Өнгөрсөн 30 жилийн хугацаанд шүүх иргэдэд алагчилж хандаж ирсэн. 10 мянган төгрөг хулгайлсан иргэнийг шоронд зовоож хатаадаг атлаа 10, 20 тэрбум төгрөг хулгайлсан эрх мэдэлтэнгүүдийн толгойг нь илээд өнгөрдөг байдлыг л энэ хуулиар таслан зогсоох нь хуулийн гол зорилго байх хэрэгтэй.

Чоно борооноор гэгчээр таван хуулийг нэгтгэн оруулж ирчихээд маш олон “хулгайн” заалтыг оруулж батлах гэж улайрч байна. Эрх баригч нар өөрсдийн мафийн толгойлогч нарыг шоронгоос суллахаар өдөр шөнөгүй зүтгэж байна. Эд нар бүүр дарамтанд орчихсон байна. Тэднийг өдөр болгон шоронгоос дарамталж зурвас илгээгээд тэдний амар заяаг үзүүлэхгүй байна гэж үзэж байна.

Хамгийн аюултай нь шүүгч нарыг шударга байлгах ёстой, түүнд хяналт тавих учиртай “Шүүхийн сахилгын хороо”-г эрх баригчид өөрсдөө томилдог, байгуулдаг байхаар батлах гэж улайрч байна. Үүнийг батлах юм бол монголын ард түмэнг 30 жил дарласан цагаан захтнууд наранд гарч ирнэ. Улстөрчдийн шударга байх үгүй нь мөн л үүнээс шалтгаална. Маш олон бүлэглэлүүд өнөөдөр шоронд байгаа. Тэд улс эх орондоо учруулсан хохирлоо барагдуулахгүйгээр энэ хууль батлагдвал шоронгоос гарах гээд байна” хэмээн байр сууриа илэрхийлэв.

Б.Баатар