“Эрдэнэс Монгол” ХК-ийн дэд захирлын төлөөх марафонд тэргүүлэгчдийн нэрс хэдийнэ тодорчээ.

Тодруулбал, “Эрдэнэс Монгол” ХК-ийн дэд захиралд УИХ-ын Тамгын газрын дарга асан Ц.Цолмон, УИХ-ын гишүүн асан Л.Энхболд, УИХ дахь МАН-ын бүлгийн дарга Д.Тогтохсүрэнгийн зөвлөх асан Л.Хосбаяр нарыг дэвшүүлж, хувийн ашиг сонирхлын урьдчилсан мэдүүлгийг хянуулахаар Авлигатай тэмцэх газарт шилжүүлсэн гэдгийг эх сурвалж мэдээлэв.

"Эрдэнэс Монгол" ХК-ийн удирдлагад УИХ-ын гишүүн асан Л.Энхболдын нэр цойлж байгаад иргэд нэлээд шүүмжлэлтэй хандаж байгаа юм. Тодотговол ЖДҮХС-гийн мөнгийг шамшигдуулсан хэмээн "аавын хаалга" татах дээрээ тулж байсан эрхэм ийн дэвших нь ёсзүйн хувьд байх боломжгүй зүйл хэмээж буй. 

Эргэн санахад, УИХ-ын гишүүн асан Л.Энхболд төрсөн охин Э.Мандухайнхаа нэр дээр бүртгэлтэй “Мийт Экспорт Интернэшнл” компаниар дамжуулан нэг тэрбум 300 сая төгрөгийн зээл ЖДҮХС-аас авсан, авсан зээлээ зориулалтын бусаар ашиглаж, өр зээлээ дарсан, банк бусаар дамжуулан мөнгө угаасан гэх хэргээр шалгуулж байсан. Энэ талаар Нийслэлийн ерөнхий прокурорын орлогч прокурор Ц.Насанбат “Л.Энхболд нарт холбогдох хэргийн мөрдөн байцаалтын ажиллагаа дуусаагүй” гэсэн тайлбар өгч байсныг ард түмэн мартаагүй байна. 

Гэтэл хийсэн хэргийнх нь дуулиан дамжиж амжаагүй байхад ийнхүү "Эрдэнэс Монгол"-ийн дэд даргаар томилох тухай яригдаж байгаа нь үнэхээр хачирхалтай. Бусад хоёр нэр дэвшигчийн хувьд МАН-д дээгүүр байр суурьтай байдаг учир ийнхүү албан тушаалын "бялуу" хүртэж байгаа гэх. 

Ер нь энэ мэтээр авилга, албан тушаалын хэрэгт холбогдсон нөхдөө албан тушаалаар шагнаад байвал МАН ирэх жил болох Ерөнхийлөгчийн сонгуулиар ард түмнээс ямар дүн авах нь ойлгомжтой юм. 

Б.Баатар