Жил бүрийн арваннэгдүгээр сарын 25-ас арханхоёрдугаар сарын 10-ны хооронд олон улс нэгдмэл санаан дор Жендерт суурилсан хүчирхийллийн эсрэг аяныг явуулдаг. Манай улс энэ жилийн аяныг “Хүчирхийллийг яг одоо цэглэе” уриан дор акц зохион байгуулж өнгөрүүлсэн.

Түүнчлэн охид, эмэгтэйчүүдийн хүчирхийллийн эсрэг эрчүүдийг хамарсан хамгийн том хөдөлгөөн болох “Цагаан туузтаны аян”-д Монгол Улс нэгдэн оржээ. Ингэснээр цагаан тууз зүүсэн хэн боловч хүчирхийллийн хажуугаар үл тэвчиж, тэмцэх юм.

Өнгөрсөн болон энэ удаагийн парламентын нэг онцлог нь хамгийн олон эмэгтэй гишүүн сонгогдсон гэдгээрээ онцлог.

Эмэгтэй гишүүдээс нийгмийн эмзэг асуудлыг анхаарч ажиллахыг хүсдэг. Өнгөрсөн хугацаанд олон хүүхэд, эмэгтэйчүүд харгис этгээдийн гарын шүүс, золиос болж харамсалтайгаар хорвоогоос буцсан. Харамсалтай нь өнгөрсөн парламентын эмэгтэй гишүүд нэг нь ч энэ асуудлаар хөөцөлдөж, эмгэнэл илэрхийлэх нь бүү хэл дуу хоолойгоо ч хүргээгүй. Уг нь эмэгтэйчүүдээсээ ийм л зүйийг хүсдэг. Эх хүн, эмэгтэй хүн гэдэг утгаар нийгмийн эмзэг асуудал дээр анхаарч ажиллаач гэж. 

Харин энэ удаагийн парламентын шинээр сонгогдсон гишүүд бодлого ярьж, идэвхийлэн оролцож байгаа нь сайн хэрэг. Хүчирхийллийг үл тэвчихэд хүн бүрийн оролцооноос гадна соён гэгээрүүлэх акц, хөтөлбөр хамгийн чухал байна. Гишүүн Ц.Мөнхцэцэг, Б.Баярсайхан та бүгдийн байгуулсан хүчирхийллийн эсрэг УИХ-ын бүлгэм үр дүнд хүрнэ гэж найдъя. Үр бүтээлтэй ажиллаж чадвал дэмжээд л байна иргэд бид чинь. 

А.Сүх