“Бүлх” залгисан мэт чимээгүй байдаг гишүүн “Монгол хэл мөхөх нь” хэлд орлоо хэмээн иргэдээс багагүй шүүмжлэл сонсоод байгаа гишүүн бол Гомпилдоогийн Мөнхцэцэг. Түүний хувьд УИХ-ын сонгуулийн зургаадугаар тойрог, Говьсүмбэр, Дундговь аймагт УИХ-ын гишүүн Сү.Батболдын хамт нэр дэвшиж хоёр дахь удаагаа парламентад улиран сонгогдсон. Зарим нь ярихдаа намын нэрээр эсвэл Сү.Батболдынхоо “нүүр”-ээр гарч ирлээ гэж ярьдаг юм.

Ер нь хэцүү л дээ. Хуулийн төсөл санаачилж байсан эсэх нь тодорхойгүй, чуулганы нэгдсэн хуралдаан дээр тоотой хэдэн удаа л үг хэлж байсан байх. Тиймээс ч намын нөхөр нь чирж байгаад гаргасан гэдэг олны үг оргүй биш ээ.

Тэрбээр өнгөрсөн баасан гарагийн нэгдсэн чуулганаар “Эх хэлний тухай хууль оруулж өгөх шаардлагатай байна. Энэ дээр яам ямар санал дүгнэлттэй байгаа вэ. Эх хэлний тухай хууль шинэчилсэн найруулгаар орж ирэх шаардлагатай байна. Дэлхийн мөхөж байгаа таван хэлний тоонд монгол хэл орсон байна лээ” гэсэн нь “хэлд орсон гишүүн”, “худалч гишүүн” зэрэг хоч зүүхэд хүрээд буй.

Эх хэлний хэрэглээгээ нэмэгдүүлэх, түгээн дэлгэрүүлэх гэсэн түүний санаа зөв. Гэхдээ түүний барин тавин хэлсэн баримт нь л илүүц байлаа. Учир нь Монгол хэл дэлхийн мөхөж буй таван хэлний тоонд багтаагүй. ЮНЕСКО-н устах аюулд орсон хэлний жасаалтад монгол хэл ороогүйг ч иргэд төвөггүй олоод мэдчих учраас тэр. Энэ бүхний эцэст тэр судалгаагүй, болгоомжгүй ярьсныхаа дүнд хочлуулаад л дууслаа.

Б.Лхам