Ерөнхий сайд асан Ч.Сайханбилэгийг өдгөө олон улсын Интерполоос эрэн сурвалжилж буй. Түүнийг Монгол Улсын шүүхээс Оюутолгойн гэрээ болон “Эрдэнэт” үйлдвэрийн 49 хувьтай холбоотой асуудалд буруутган шүүх зуурт эмчлүүлэх нэрийдлээр АНУ-руу яваад оргон зайлсан юм.

Ч.Сайханбилэгийг “Эрдэнэт” үйлдвэрийн 49 хувийг УИХ-ын шийдвэргүйгээр , бүр АН-ын бүлэг ч мэдээгүй байхад хууль зөрчин Худалдаа Хөгжлийн банкинд өгсөн гэсэн үндэслэлээр шүүхээс буруутган бусад хэрэгтэй нь хамтатган ял төлөвлөөд байсан билээ. Түүний хувьд энэ бүхнийг огт хүлээн зөвшөөрдөггүй зохиомол хэрэгт яллах гэлээ хэмээдэг. Энэ талаараа  “Надад тохсон хоёрдахь хэрэг нь Оюутолгойтой бараг л адил хүчин чадалтай "Эрдэнэт" үйлдвэрийн бараг тал хувийг харийн орны өмчлөлөөс эх орондоо авчирч чадсан асуудал байсан.  “Эрдэнэт”-ийн асуудлаар гаргасан шийдвэрээ зөв байсан гэдэгт би 100 хувь итгэлтэй байна” гэж байлаа. Харин уг асуудлыг чуулганаар хэлэлцэх үед гишүүд түүнийг Эрдэнэтийн 49 хувийг авчирсан сайд болж түүхэнд үлдэхийн тулд нягталж шалгалгүй шийдвэр гаргасан хэмээн буруутгаж байлаа.

ХХБ-ны гүйцэтгэх захирал асан О.Орхон: Бид Казакстаны талаас өрсөж, 49 хувийг худалдан авсан нь оносон

Хэргийн хамсаатнаар мөн Худалдаа хөгжлийн банкны гүйцэтгэх захирал асан О.Орхонг баривчлан холбогдуулан шалгасан юм. Эрүүгийн цагдаагийн газраас Худалдаа хөгжлийн банкны ТУЗ-ийн дарга Д.Эрдэнэбилэг, тус банкны гүйцэтгэх захирал О.Орхон “Монголиан коппер корпорэйшн” компанийн гүйцэтгэх захирал Ц.Пүрэвтүвшин нарыг “Эрдэнэт” үйлдвэрийн 49 хувийг ОХУ-аас худалдан авах үйл ажиллагааг зохион байгуулсан үйл ажиллагаанд оролцсон гэх асуудалтай холбогдуулан 2019 оны гуравдугаар сард баривчлан шалгасан.  Харин О.Орхон  өөрт нь нялзааж буй уг хэргийг хүлээн зөвшөөрдөггүй бөгөөд харин ч “Бид Казакстаны талаас өрсөж, 49 хувийг худалдан авсан  нь оносон” гэж байлаа.

Д.Эрдэнэбат: ЭЗ нь надаар дуусч, АЗ нь ард түмэнд минь ирээсэй

Ч. Сайханбилэг Ерөнхий сайдын үед танхимд нь ажиллаж байсан Д.Эрдэнэбат мөн уг хэргийн холбогдогчоор шалгуулж, хорих ялаар шийтгүүлсэн билээ. Тэрбээр шүүх танхимд “Эрдэнэтийн 49 хувийг Монголд авчирсан тэр үеийн Засгийн газрын шийдвэр азтай ч гэмээр, эзтэй ч гэмээр цаг үе, шийдвэр байсан. Гэхдээ энэ шийдвэрийн ЭЗ нь надаар дуусч, АЗ нь ард түмэнд минь ирж эхлээсэй” гэж хүсч байна  гэж байлаа.

Ямартай ч, 49 хувьтай холбоотой асуудлаар тэднийг шүүх буруутгасан ч тэд бусдад алдах байсан “Эрдэнэт”-ийг олж ирсэн гавьяатай гэдэгтээ итгэлтэй байдаг. Энэ бүхнийг сөхөхийн учир, Засгийн газар “Эрдэнэт” үйлдвэрийг төрд 100 хувь авсан нь хамгийн оновчтой шийдвэр байсныг өчигдрийн үйл явдал харууллаа. Харин Ерөнхий сайд асан Ч.Сайханбилэгийн гаргасан шийдвэр олон албан тушаалтныг хөлдөө чирсэн ч  өөрийнх нь хэлж буйгаар, харин ч олж авчирсан гавьяатай юу гэдгийг цаг хугацаа харуулах болж байна.

У.Тэргэл