Боловсрол шинжлэх ухааны сайд Л.Цэдэвсүрэнгийн бодлогогүй шийдвэр эцэг эхчүүдийн дургүйцлийг төрүүлж байна. 2020 оны 12 дугаар сарын 15-ны өдөр буюу мягмар гарагаас эхлэн сургуулийн орчинд давтлага хийхийг Боловсрол, шинжлэх ухааны яамнаас зөвшөөрсөн талаарх мэдээлэл хоёр хоногийн өмнө цацагдсан.

Тодруулбал, “Боловсрол, шинжлэх ухааны сайдын 2020 оны 12 дугаар сарын 11-ний өдрийн А/180 дугаар “Заавар батлах тухай” тушаалаар Ерөнхий боловсролын сургуулийн суралцагчдад 2020-2021 оны хичээлийн жилийн нэгдүгээр улирлын теле, цахим хичээлийг бататгах, суралцагчдын сурах үйлийг дэмжих зорилготой давтлагыг сургуулийн орчинд арванхоёрдугаар сарын 15-ны өдрөөс зохион байгуулж болно” гэх шийдвэрийг БШУ-ын сайд гарсан юм. Давтлагыг бүх нийтийн бэлэн байдлын зэрэгт шилжсэн орон нутгийн хэмжээнд, тухайлбал нийслэл болон Архангай, Сэлэнгэ зэрэг аймагт энэ зааврыг мөрдөхгүй байхаар зохицуулсан байдаг.

Гэтэл энэхүү мэдээлэл цацагдсан дариуд шүүмжлэлд өртөж, Боловсролын сайд теле хичээлийг үр дүнгүй хэмээн дүгнэлээ гэдгийг хэлэх хүн олон байсан бөгөөд цар тахлын аюул холдож амжаагүй байтал давталга зохион байгуулахыг зөвшөөрсөн нь цаг үеэ олоогүй шийдвэр хэмээх шүүмжлэлд өртөөд байсан юм.

Тэгвэл эл шийдвэрийг Шадар сайд өөрчилсөн талаар мэдээллээ. Шадар сайд Я.Содбаатар “Улсын хэмжээнд өндөржүүлсэн бэлэн байдлын зэрэгт шилжсэн коронавирусний халдвар бүртгэгдээгүй 18 аймаг байгаа. Эдгээр аймгийн боловсролын байгууллага, эцэг, эхчүүдээс теле болон онлайн хичээл явагдаж байгаатай холбогдуулан хоцрогдол үүсэж байна. Хоцрогдлыг арилгах зорилгоор халдвар гараагүй аймгуудад цөөн тооны хүүхдүүд нэг дор цуглуулж давтлага өгч болно гэсэн чиглэлтэй байсан. Энэ шийдвэрийг 2021 оны нэгдүгээр сарын 1-нийг хүртэл хойшлуулсан. Боловсрол, шинжлэх ухааны сайдад энэ талаар чиглэл өгч, давтлагыг хойшлуулахаар болсон. 2020 оныг дуустал Монгол Улсын хэмжээнд сурагчдад давтлага өгөх зэргээр цуглуулахгүй” гэсэн юм.

Ийнхүү БШУ-ны сайд Л.Цэдэвсүрэнгийн бодлогогүй шийдвэрийг шадар сайд баллуурдав.  

Б.Баатар