Халдашгүй байдлын дэд хорооны дарга Н.Энхболд цаг үеийн асуудлаар мэдээлэл өглөө.

-Олон улсын парламенын холбоо УИХ-ын гишүүн Ж.Эрдэнэбатын халдашгүй байдалд нь халдсан гэсэн дүгнэлт УИХ-д ирүүлсэн гэсэн. Энэ талаар мэдээлэл өгнө үү?

-Энэ асуудлыг Халдашгүй байдлын дэд хороо хэд хэдэн авч хэлэлцсэн. Шүүх, прокурорын байгууллагад хүсэлт хүргүүлсэн. Үндсэн хуулийн дагуу бүрэн эрх нь УИХ-д хадгалагдаж байгаа гишүүн. Дээр нь СЕХ-оос албан ёсоор нэр дэвшээд өрсөлдсөн хүнийг хуульд заасны дагуу нэгдүгээрт, Ерөнхий прокурорын оруулсан болон хоёрдугаарт, СЕХ-оос зөвшөөрөл авсан эсэх асуудлаар. Мөн эхний хоёр шатны шүүхээс гарсан шийдвэрийн талаар байр сууриа иэлрхийлээч гэсэн бичиг явуулсан. Одоогоор хариу ирээгүй байна. Бид УИХ-ын гишүүний болон сонгуульд нэр нь дэвшсэн этгээдийн халдашгүй байдал нь зөрчигдсөн гэж үзэж байр сууриа илэрхийлсэн.

Хоёрдугаарт, ОУПХ парламентчдын эрх нь зөрчигдөж байгаа эсэхэд хяналт тавьж, зөрчигдсөн эсэх нь тогтоогдвол шалгадаг, хянадаг дүрэмтэй. Энэ асуудлыг хянаж, шалгах нь зүйтэй гэсэн саналыг хүргүүлсэн.

-ОУПХ өмнө нь С.Зориг агсны хэрэг одоо УИХ-ын гишүүн Ж.Эрдэнэбаттай холбоотой хэрэг дээр дүгнэлт илгээжээ. Монгол Улсын улстөрчдийн асуудлыг ингэж сөхөж байгаа нь манай улсын нэр хүндтэй холбоотой гэж харах олон хүн байна?

-ОУПХ парламентын халдашгүй байдал, гишүүний халдашгүй байдал талаас нь санал дүгнэлт хийгээд явуулдаг. Тухайн улс оронд нь ирээд шалгалт хийдэг, шаардлага тавьдаг байгууллага. Мэдээж хууль зөрчигдсөн байвал хууль хяналтын байгууллагын хувьд таатай зүйл биш нь ойлгомжтой. Нэгэнт хэрэг нээсэн нь өөрөө том асуудал.

-Одоо манай улс ямар үйлдэл хийх ёстой вэ?

-Халдашгүй байдлын дэд хороо тухайн хүний хуулиар олгогдсон эрх нь зөрчигдсөн үү гэдэгт хяяналт тавина. Түүнээс хойш бусад нь хуулийн байгууллагын хийх асуудал. Хуулийн дагуу хяналт тавьж, дүгнэлт гаргах эрхтэй.

-ОУПХ халдашгүй байдалд нь халдсан байна гэж үзсэн байна. Энэ нөхцөл байдал хуулийн байгууллагад хэрхэн нөлөөлөх бол?

-Шүүх, хуулийн байгууллага хараат бусаар хуулийн дагуу ажиллах ёстой. Хэрэг Дээд шүүх дээр явж байгаа.

Б.Лхам