УИХ-ын гишүүн Ц.Мөнх-Оргил цаг үеийн асуудлаар мэдээлэл өглөө.

Тэрбээр “ОУПХ УИХ-ын гишүүн Ж.Эрдэнэбатыг УИХ-ын зөвшөөрөлгүйгээр, Ерөнхий прокурор асуудал оруулаагүй байхад хууль зөрчиж баривчилж, цагдан хорьж ял эдлүүлж байгаа юм байна. Энэ нь Монгол Улсын хууль тогтоомж болон олон улсын парламентчдын гишүүдийн эдэлдэг эрхэд халдсан байж болзошгүй гэдэг үндэслэлээр хэрэг нээсэн. Хэрэг нээсэн тухайгаа УИХ-д хүргүүлсэн. Хэргийг судлах ажлын хэсэг гаргаж байгаагаа мэдэгдсэн. Улмаар УИХ болон холбогдох байгууллагуудаас мэдээлэл хүссэн байна лээ.

Энэ асуудал УИХ-ын Төрийн байгуулалтын байнгын хорооны хүрээнд ажилладаг гишүүний халдашгүй байдлын Дэд хорооны анхааралд байгаа.

Шүүхийн шийдвэр зөв буруу эсэх нь манай хорооны асуудал биш.

Харин УИХ-ын гишүүнийг ажил үүргээ гүйцэтгээд явж байхад нь УИХ-ын зөвшөөрөлгүйгээр баривчлаад, цагдан хорьсон, ял оноож байгаа нь хууль зөрчсөн асуудал гэж дүгнэж байгаа.

Энэ нь МАН-ын эсвэл хувь хүний асуудал биш. Халдашгүй байдал гэдэг нь тэр гишүүнд өгч байгаа эрх биш. Энэ эрх нь УИХ-д байдаг. Өнөөдөр халдашгүй эрхтэй 77 хүн бий. УИХ-ын гишүүд болон Ерөнхийлөгч.

УИХ-ын гишүүн бүрийн цаана иргэд байна. Иргэд төр барих эрхээ хэрэгжүүлж байгаа гэдгээр ойлгогдож иргэд эрхээ эдэлж байна гэсэн санаа.

Зөвхөн Ерөнхий прокурор үндэслэлээ тайлыарлаж асуудлаа оруулж ирнэ. Гэтэл энэ тохиолдолд Ерөнхий прокурр ийм асуудал оруулж ирээгүй байхад цагдан хорих арга хэмжээ авах ёсгүй. Энэ нь өөрөө УИХ-д хадгалагдаж байгаа эрхэд халдаад байгаа юм" гэлээ.

А.Сүх