Монгол Улсын зургаа дахь Ерөнхийлөгч тодроход хагас хүрэхгүй жилийн хугацаа үлдлээ. Шинэ Үндсэн хуульд Ерөнхийлөгчийг насны босгыг өндөрлөж, зургаан жилээр нэг удаа сонгохоор заасан. Энэ хүрээнд УИХ-ын чуулганаар Ерөнхийлөгчийн сонгуулийн тухай хуулийн хэлэлцүүлэг ид өрнөж буй.

Төрийн тэргүүнээ тодруулах ээлжит сунгаанд одоогийн Ерөнхийлөгч болон өмнөх Ерөнхийлөгчид нэр дэвших боломжтой эсэх нь ихээхэн маргаан дагуулаад байсан. Ялангуяа энэ талаар УИХ-ын гишүүн Т.Доржханд хоёр удаа тодруулсан ч бөөрийнхийлсөн хариулт авсан юм. Тэгвэл Сангийн сайд Ч.Хүрэлбаатар энэ талаар өөрийн цахим хуудастаа албан ёсны байр суурь хэлжээ. Тэрбээр “Нэр дэвших боломжгүй. Нэг хүн хамгийн ихдээ өмнөх Үндсэн хуулиар хоёр удаа буюу найман жил, шинэ Үндсэн хуулийн өөрчлөлтөөр хамгийн ихдээ зургаан жил, тэгэхээр аль ч тохиолдолд найман жилээс дээш Ерөнхийлөгч байж болохгүй. Тийм учраас өмнөх болон одоогийн Ерөнхийлөгч нар нэр дэвших боломжгүй” гэжээ.

Ерөнхийлөгчийн ээлжит сунгаанд парламентад суудалтай дөрвөн намын төлөөлөл нэр дэвших эрхтэй. Эрх баригч намаас нэр дэвших боломжтой, насны болзол хангасан таван хүний нэр зарлаад буй.

Тодруулбал, Ерөнхий сайд У.Хүрэлсүх, УИХ-ын дарга Г.Занданшатар, ХЗДХ-ийн сайд асан Ц.Нямдорж, УИХ-ын гишүүн Н.Энхболд, Сү.Батболд нарыг сунгаанд нэр дэвших боломжтой эрхмүүдээр нэрлэсэн.

Харин ХҮН-ын хувьд тус намд 50 нас хүрсэн нэр дэвшигч байхгүй бөгөөд нэр дэвших хүн тодорхойгүй талаар УИХ-ын гишүүн Т.Доржханд өмнө нь өгсөн яриандаа дурдаж байсан юм.

Түүнчлэн МАХН-ын хувьд Ерөнхийлөгч асан Н.Энхбаярт дахин нэр дэвших найдлагагүй боллоо. Харин УИХ-ын гишүүн С.Ганбаатар өөрөө нэр дэвшвэл ялалт байгуулах магадлал өндөр гэж иргэд үзэж байна.

Харин АН-ын хувьд УИХ-ын гишүүн асан Ц.Оюунгэрэл, Ерөнхий сайд асан Р.Амаржаргалын нарын нэр яригдаж байна.

Юутай ч одоо байгаа Ерөнхийлөгч болон өмнөх Ерөнхийлөгчид нэр дэвших боломжгүй болжээ.

Б.Лхам