Шинжлэх ухааны академийн ээлжит Их чуулган цахимаар хуралдаж, ШУА-ийн дэд ерөнхийлөгч, эрдэмтэн нарийн бичгийн дарга, Тэргүүлэгч гишүүдийн сонгуулиа явуулсан байна. Энэ удаагийн сонгуулиар  ШУА-ийн дэд ерөнхийлөгч Г.Чулуунбаатар, эрдэмтэн нарийн бичгийн дарга Б.Авид нарыг улираан сонгожээ. Тэргүүлэгч гишүүдийн тоог Их чуулганаар тогтоодог журамтай бөгөөд өмнө нь 17 гишүүнтэй байсан бол энэ удаа 15 гишүүн болгон өөрчилсөн аж.

ШУА-ийн тэргүүлэгч гишүүнээр Д.Рэгдэл /Академич/, Г.Чулуунбаатар/Академич/, Б.Авид/Академич/, Т.Галбаатар/Академич/, Р.Гончигдорж/Академич/, Т.Ган-Эрдэнэ/Академич/, С.Нарангэрэл/Академич/, Д.Дашжамц/Академич/, Д.Содномдорж/Академич/, С.Чулуун/Академич/,  Ц.Лхагвасүрэн/Академич/, Б.Бямбаа/Академич/, Ж.Чинбүрэн /УИХ-ын гишүүн/, Я.Содбаатар /МУ-ын шадар сайд/, Л.Оюун-Эрдэнэ /ЗГХЭГ-ын дарга/ нар сонгогдсон байна.

Шинжлэх ухааны академийн тэргүүлэгчээр сонгогдсон төрийн түшээдийг цахим сүлжээнд багагүй шүүмжилж, басхүү ямар шалтгуураар эл тэргүүлэгчдийн эгнээнд оров гэх асуулт хөвөрч байгаа юм. ШУА-ийн тэргүүлэгчээр сонгогдсон төрийн түшээдийн CV г танилцуулж байна. 

Шадар сайд, ШУА-ийн тэргүүлэгч гишүүн Я.Содбаатар нь: 1974 онд Архангай аймгийн Цэцэрлэг хотод төрсөн. 46 настай. Ам бүл – 5. Үндэс угсаа – Халх.

Боловсрол: 

• 1992 онд Өвөрхангай аймгийн Хархорин сумын 1 дунд сургууль
• 1997 онд Технологийн дээд сургууль
• 2004 онд Удирдлагын академи
• 2015 онд  Монгол Улсын Боловсролын их сургуулийг тус тус төгссөн. Физикч-инженер мэргэжилтэй, шинжлэх ухааны докторын зэрэгтэй.

Ажилласан байдал:

• 1997-1999 онд  ШУА-ийн харьяа Дулаан техник, үйлдвэр, экологийн хүрээлэнд эрдэм шинжилгээний ажилтан
• 1999-2005 онд Монголын Ардчилсан Залуучуудын социалист холбооны Нарийн бичгийн дарга, II ерөнхий нарийн бичгийн дарга
• 2005-2008 онд Үйлдвэр худалдааны сайдын зөвлөх
• 2009-2011 онд Мэргэжлийн хяналтын ерөнхий газрын дарга
• 2011-2012 онд Монгол Ардын намын Нарийн бичгийн дарга
• 2012-2020 онд Монгол Улсын Их хурлын гишүүн
• 2018-2019 онд Монгол Улсын Засгийн газрын гишүүн, Зам, тээврийн хөгжлийн сайдаар тус тус ажилласан.

ЗГХЭГ-ын дарга, ШУА-ийн тэргүүлэгч гишүүн Л.Оюун-Эрдэнэ нь: 1980 онд Улаанбаатар хотод төрсөн. 40 настай. Ам бүл – 5.  Үндэс угсаа – Халх.

Боловсрол: 

• 1998 онд Хэнтий аймгийн Бэрх хотын Ерөнхий боловсролын сургууль
• 2001 онд Бэрс дээд сургууль
• 2008 онд Монгол Улсын их сургуулийн Хууль зүйн сургууль
• 2015 онд АНУ-ын Харвардын их сургуулийг тус тус төгссөн. Сэтгүүлч, эрх зүйч мэргэжилтэй. Боловсрол судлал болон төрийн удирдлагын магистрын зэрэгтэй.

Ажилласан байдал: 

• 2001-2002 онд Хэнтий аймгийн Бэрх хотын Захирагчийн ажлын албанд Тамгын газрын дарга
• 2002-2007 онд “Дэлхийн Зөн Монгол” Олон улсын байгууллагын бүсийн захирал
• 2007-2008 онд Нийслэлийн Баянзүрх дүүргийн Засаг даргын Тамгын газрын Нийгмийн бодлогын хэлтсийн дарга
• 2008-2010 онд Монгол Ардын Намын Удирдах зөвлөлийн Хэрэг эрхлэх газрын дарга
• 2010-2015 онд Нийгмийн Ардчилал Монголын Залуучуудын холбооны ерөнхийлөгч
• 2011-2012 онд Монгол Ардын Намын Нарийн бичгийн дарга
• 2012 онд Монгол Ардын Намын Ерөнхий нарийн бичгийн даргын үүрэг гүйцэтгэгч
• 2016 оноос одоог хүртэл Монгол Улсын Их Хурлын гишүүн,
• 2019-2020 онд Монгол Улсын сайд, Засгийн газрын Хэрэг эрхлэх газрын даргаар тус тус ажилласан.

Соёлын сайд, ШУА-ийн тэргүүлэгч гишүүн С.Чулуун нь: 1977 онд Төв аймгийн Баянцагаан суманд төрсөн. 43 настай. Ам бүл – 5. Үндэс, угсаа – Халх.

Боловсрол:

• 1995 онд Төв аймгийн Зуунмод хотын 2 дугаар сургууль
• 1999, 2000 онд Монгол Улсын Их Сургуулийг тус тус төгссөн. Түүхч, түүхийн багш мэргэжилтэй, шинжлэх ухааны докторын зэрэгтэй, академич цолтой.

Ажилласан байдал:

• 1999-2001 онд ШУА-ийн Түүхийн хүрээлэнд эрдэм шинжилгээний ажилтан
• 2004-2006 онд МУИС-ийн Түүхийн тэнхимд багш
• 2006-2009 онд ХҮДС-д дэд захирал
• 2009-2010 онд МУИС-ийн Нийгмийн шинжлэх ухааны сургуульд Эрдэмтэн нарийн бичгийн дарга
• 2010-2015 онд ШУА-ийн Түүхийн хүрээлэнгийн захирал
• 2015-2019 онд ШУА-ийн Түүх, археологийн хүрээлэнгийн захирал
• 2019 оноос одоог хүртэл ШУА-ийн Түүх, угсаатны зүйн хүрээлэнгийн захирлаар ажиллаж байна.

УИХ-ын гишүүн, ШУА-ийн тэргүүлэгч гишүүн Ж.Чинбүрэн нь: 1972 онд Улаанбаатар хотод төрсөн. 1980-1990 онд нийслэлийн 23-р дунд сургуулийг, 1991-1997 онд Анагаах ухааны их сургуулийг хүний их эмчээр тус тус суралцаж төгссөн.

Боловсрол

• 1990 онд Нийслэлийн 23 дугаар дунд сургууль
• 1991-1997 онд АУИС, хүний их эмч
• 2000-2001 онд Хавдар судлалын төв, хавдар судлаач эмч
• 2001-2002 Швейцари Улс, Лозаны их сургууль, мэс заслын эмчийн резентур
• 2013-2015 онд Япон, Токиогийн Анагаах ухааны эмэгтэйчүүдийн их сургууль, анагаах ухааны доктор

АЖИЛЛАСАН БАЙДАЛ

• 1997-1998 онд Анагаах ухааны хүрээлэн, шинжлэх ухааны туслах ажилтан
• 1998-2008 онд ХСҮТ, ерөнхий мэс заслын тасаг, мэс заслын эмч
• 2008-2016 онд ХСҮТ, Элэг цөс, нойр булчирхайн мэс заслын тасгийн эрхлэгч Бүгд Найрамдах Казахстан Улсын Шымкент хотын хавдрын төв, сургагч багш
• 2014-2016 онд АШУҮИС, Хавдар судлалын багш
• 2015 оноос Монголын элэг цөс, нойр булчирхайн нийгэмлэгийн тэргүүн
• 2016.04-11 сард ЭМЯ, Хавдрын мэргэжлийн салбар зөвлөлийн дарга
• 2016-2019 онд ХСҮТ-ийн ерөнхий захирал
• 2020 онд ХСҮТ-ийн зөвлөх эмч
• 2020 оноос Монгол Улсын Их Хурлын гишүүн