Ардчилсан намын дарга С.Эрдэнэ тушаал гаргаж, "Ц.Туваанд шилжүүлээд байсан намын даргын түр эрхийг цуцалж, тамга тэмдэгийг хүлээлгэн өгөх тушаал гаргасан байна. Хэрэв тамга тэмдэг хүлээлгэн өгөөгүй тохиолдолд хуулийн хариуцлага хүлээлгэнэ" гэжээ. 

Ташрамд өгүүлэхэд, Ардчилсан нам X Их хурал цахимаар зохион байгуулагдаж өчигдөр шөнө дуусчээ. Хурлаараа намын даргаа бүх гишүүдийн саналаар сонгодог дүрмийг өөрчилж, ҮБХ, Их хурал гэсэн хоёр шатлалаар сонгох асуудлыг хэлэлцсэн. АН-ын даргын үүргийн түр орлон гүйцэтгэгч Ц.Туваан намын түр удирдлагын хувьд ҮБХ-гоо хуралдуулж, Их хурлаа зохион байгуулсан. Харин АН-ын өмнөх дарга С.Эрдэнэ Ц.Туваанаа дүрмийн бус зүйл хийж байгаа учраас түүний гаргасан шийдвэрүүд хүчингүй гэдгийг хэлсэн.

Өөрөөр хэлбэл, үндсэн дүрмийн дагуу дараагийн даргыг тодруулахгүйгээр эхлээд дүрмээ өөрчилж байгаа нь өөрөө дүрэм зөрчсөн үйлдэл гэдгийг тэрбээр онцолж байсан юм. Тиймээс ч дээрх тушаалыг гаргаж, тамга тэмдэгээ буцааж авахаар шийдсэн бололтой. 

Харин Х их хурлаар хэд хэдэн өөрчлөлт орсон гэдгийг эх сурвалж мэдээлэв. Тодруулбал, Ардчилсан намын даргыг нийт гишүүдийн сунгаанаар сонгох дурмийг өөрчилж, их хурлаараа сонгохоор болсон байна. Мөн үндсэн дүрмийн хүрээнд санхүүгийн хяналтын албыг шинээр байгуулахаар болжээ.

Тиймээс хурлаас гарсан өөрчлөлтүүдийг Улсын Дээд шүүхэд хянуулах бөгөөд өөрчлөлт оруулсан дүрмийг маргаангүй гэвэл албан ёсоор хэрэгжүүлж эхлэх аж. 

Б.Баатар