2017 оны Ерөнхийлөгчийн сонгуулийн үеэрх “топ” амлалтуудын нэг нь Ерөнхийлөгч Х.Баттулгын оффшор бүс дэх 17 тэрбум ам.долларын хөрөнгийг Монголд оруулж ирэх байв.

Тэрбээр Ерөнхийлөгчөөр сонгогдсон даруйдаа оффшор бүсэд данстай хүмүүст хандаж, тус бүсээс мөнгөө татаж авах 49 хоногийн уриалгыг гаргаж,  хэрэв дурдсан хугацаанд Монголын банкууд руу татагдаагүй мөнгөн хөрөнгө, түүнийг эзэмшигчдийн асуудлыг холбогдох хуулийн дагуу илрүүлэн илчилж, зохих хариуцлага хүлээлгэх нь шударга ёсонд нийцнэ хэмээн мэдэгдэж байсан ч тусыг эс олсон байдаг юм. Өдгөө сонгуулийн бүдгэрсэн амлалтуудын л нэг болж үлдэх бололтой.  

ОУВС, Олон улсын эдийн засгийн хамтын ажиллагааны байгууллагаас нийт 42 улсыг “оффшор бүс” хэмээн тооцож нэрлэсэн байдаг. Оффшор дансдаа нэг сая ам.доллар байршуулаад мартсан Сангийн сайд асан С.Баярцогтод холбогдох хэрэг анх нийтэд мэдээлэгдсэнээс хойш Олон Улсын Эрэн сурвалжлах сэтгүүлчдийн консорциумаас дахин 49 нэр зарласан. Эдгээрээс одоогоор нийтэд ил байгаа мэдээллээр 70 сая ам.доллар л орж ирээд буй. Үлдсэн мөнгөний сураг чимээ таг.

Ерөнхийлөгчийн ээлжит сунгаа болоход ердөө хагас жилийн хугацаа үлдлээ. Үндсэндээ энэ хугацаанд хийсэн ажлуудаа, амласан амлалтаа хэр биелүүлснээ иргэддээ дүгнүүлэх цаг ойртож байна.

Гэвч оффшор бүс дэх мөнгийг оруулж ирэх амлалтыг түүнээс нэхэлтгүй бололтой. Учир нь Ерөнхийлөгч Х.Баттулгын бүрэн эрхийн хугацаа ч дуусах дөхөж, цаг ч давчуу байна. Түүнийг ирэх сонгуульд дахин нэр дэвших боломжгүй талаар эрх баригч намын гишүүд тайлбарлаж буй. Эрх баригч намынхны хэлснээр дахин нэр дэвшихгүйдээ ч тэр үү нээх хүчлэхгүй байх шиг л харагдаад байгаа юм даа. 

Б.Лхам