УИХ-ын гишүүн, АН-ын дарга асан С.Эрдэнэ хэвлэлд өгсөн ярилцлагадаа “У.Хүрэлсүхийн Засгийн газарт хариуцлага тооцох боломж бүрдэж, санал хураах мөчид манайхаас гурван хүн урвасан. Тэр гурван урвагчийн хоёр нь элчин сайдаар явах гэж байгаа бол нэг нь тендерийн дэмжлэг авчихаад Баян-Өлгийд жаргаж байна” хэмээсэн билээ. Тэгвэл энэхүү гурван урвагч нь хэн бэ.

УИХ-ын гишүүн асан  Лу.Болд, Ж.Батзандан, Д.Мурат нар болж таарч байна. Тэд АН-ын гишүүнчлэлтэй байхдаа У.Хүрэлсүхийн Засгийн газрыг огцруулах эсэх санал хураалтад татгалзсан кноп дарсан ба энэхүү үйлдлийг нь С.Эрдэнэ буруутган ийн урвагчаар нь дуудсан бололтой. Түүний хэлснээр, нам гүмхэн байсан Ж.Батзанданг нэг л өдөр Австрали улсад суух Элчин зөвлөхөөр томилох нь гэсэн мэдээлэл тархсан. Харин тэрбээр энэ үед дипломат эрхээ хэдийнэ халаасласан байв. Дараагийнх нь Ерөнхийлөгч Х.Баттулгын Аюулгүй байдал, батлан хамгаалах бодлогыг хариуцсан зөвлөх Лу.Болд юм. Түүнийг ХБНГУ-д суух Элчин сайдаар томилуулахаар Ерөнхийлөгч зүтгүүлж буй мэдээлэл хэдхэн хоногийн өмнө гарсан юм. Ерөнхийдөө улс төрийн хүрээндээ тохирч,энэ нь ч биелэх  магадлал өндөр байгаа аж.

Харин гуравдахь урвагч нь УИХ-ын гишүүн асан Д.Мурат болж таарч байна. С.Эрдэнэ даргын хэлж буйгаар, тэрбээр олон тэрбумын өртөгтэй тендер авчихаад нутагтаа жаргаж суугаа гэнэ.

Ийнхүү намын даргын суудлаа булаацалдаж, хуучин эрх мэдлээ сэргээхийг хүсч буй С.Эрдэнэ намынхаа гурван урвагчийг нийтэд зарлаж, хэрвээ тэд тухайн үед урваагүй бол нөхцөл байдал өнөөдөр эсрэгээрээ байх байсан гэх харууслын үг дайж сууна.

У.Тэргэл