Цар тахлыг дотооддоо алдсан энэ цагт хамгийн эрдсдэлтэй нь агаарын сэлгэлт муу, битүү, олноор бөөгнөрсөн орчин байдаг. Дэлхийн  олон улс орон энэ ч үүднээсээ хөнгөн ялтай хоригдлуудаа суллаж эхэлсэн. Манай улс ч энэ талын судалгааг хийж,  архаг хууч өвчтэй, сүрьеэтэй, 65-аас дээш насны болон ял эдэлж буй хүүхдүүдийн судалгааг гаргасан билээ. Энэ талаар Хууль зүйн сайд Х.Нямбаатар “ШШГЕГ-ын харьяа нээлттэй болон хаалттай хорих ангид нийт 6300 хүн бий. Тэдгээрээс эрсдэлт бүлэгт орж буй 760 хүн байгаа гэсэн судалгааг манай яамнаас гаргасан. Цар тахал дэгдсэнтэй холбоотойгоор нийт хорих ангиудад өндөржүүлсэн бэлэн байдал зарлан ажиллаж, ариутгал, халдваргүйжүүлэлтийг тогтмол хийж байгаа.  Коронавирусний халдвар тархвал барьж дийлэхгүй аюултай бүс бол шорон. Тиймээс өршөөлийн асуудлыг ярьж эхэлсэн” гэв.

Эрүүгийн хуульд нэг төрөл болж орсон Зорчих эрх хязгаарлах ялыг 2021 оны нэгдүгээр сарын 1-нээс хэрэгжүүлж эхэлнэ. Ялыг хэрэгжүүлэх бэлтгэл ажлыг хангаж дууссан ба БНХАУ-аас хөл, гарын цахилгаан гавуудыг ч захиалж, авчруулжээ.

Уг хуулийг хэрэгжүүлж эхлэхтэй холбоотойгоор дээр дурдсан эрсдэлт бүлгийн болон хөнгөн ялтай хоригдлуудыг өршөөлөөр суллан, Зорчих эрхийг хязгаарлах  ялын дагуу хянаж байх асуудлыг  ХЗДХЯ-наас хөндөж эхэлжээ. Тодруулбал, анх удаа гэмт хэрэг үйлдсэн, ялынхаа 50 хувийг эдэлсэн, хоригдох хугацаандаа зөрчил гаргаагүй болон архаг хууч өвчтэй, сүрьеэтэй, 65-аас дээш насны  760 гаруй хоригдлыг өршөөлд хамруулан бүгдийг бус эрсдэлтэй заримд нь хөл, гарын цахилгаан гав зүүн, хөдөлгөөнийг нь хянаж байх урьдчилсан төлөв гаргаад байгаа аж. Дээрх 760 хоригдлоос хэнийг нь суллахыг шүүх эцэслэн шийдэх бөгөөд Монгол Улсын Ерөнхийлөгчийн зарлиг гарснаар баталгаажих юм. 

У.Тэргэл