УИХ-ын гишүүн Б.Пүрэвдорж “Зөрчлийн тухай хуулиар шийтгүүлсэн иргэн, хуулийн этгээдэд өршөөл үзүүлэх тухай” хуулийн төслийг өргөн барихаа мэдэгдсэн.

Гэтэл зөрчлийн дийлэнх буюу 86 хувь нь жолооч нартай, тодруулбал, замын хөдөлгөөний дүрэм зөрчсөн, согтууруулах ундаа хэрэглэсэн үедээ замын хөдөлгөөнд оролцсон, удаа дараа осол аваар гаргасан, нэгдүгээр эгнээгээр дүрэм зөрчин давхидаг,  улаан гэрлээр гардаг гээд замын хөдөлгөөний дүрмийг алхам тутамдаа зөрчдөг нөхөд эзэлдэг байна.

Хамгийн гол нь 100-200 удаа торгуулсан ч торгуулиа огт төлдөггүй. Тиймдээ ч арга ядаад нэгд, замын хөдөлгөөний нягтралыг сааруулах, хоёрт, торгууль шийтгэлээ төлдөггүй, хуулийн хариуцлага хүлээдэггүй жолооч нар руу чиглэсэн арга хэмжээг Тээврийн цагдаагийн албанаас авахаар болж, нийслэлийн замыг гурван бүсчлэлд хуваах тухай хэсэгтээ ярьж байв. Энэхүү арга хэмжээг хэрэгжүүлж эхэлснээр торгуулиа төлөөгүй жолоочийг А,Б бүс рүү буюу хотын төвөөр явуулахгүй бөгөөд энэ нь торгуулийг төлүүлэх хөшүүрэг болох, нөгөөтэйгүүр, замын хөдөлгөөн тодорхой хувиар буурах байв.

Монгол Улсын хэмжээнд 1,3 сая орчим иргэн жолооны үнэмлэхтэй бол бүртгэлтэй 1,1 сая тээврийн хэрэгсэл байдаг аж. 2020 оны эхний есөн сарын байдлаар, улсын хэмжээнд замын хөдөлгөөний дүрэм зөрчсөн 1,522,500  зөрчил бүртгэсэн нь зөрчил гаргадаггүй жолооч үгүй гэж хэлж болохоор байна.

Хамгийн харамсалтай нь, замын хөдөлгөөний дүрэм зөрчсөн хариуцлагагүй жолоочийн буруугаас энэ оны эхний есөн сарын байдлаар 46,601 зам тээврийн ослын улмаас 321 хүний амь нас хохирч, 2075 хүн бэртэж, гэмтэн нийт 14,8 тэрбум төгрөгийн хохирол учруулжээ.

Тиймээс хэнэггүй, тоомжиргүй, дүрэм журмыг уландаа гишгэлж буй жолооч нарыг өршөөх нь хэр зүйтэй вэ. Цаана нь хүний алтан амь, эрүүл  мэнд яригддаг учраас үүнд хариуцлагатай хандах хэрэгтэй баймаар. Харин энэ удаагийнхныг түүний арга ядсан попролт гэж харахаас аргагүйд хүрч байна.

У.Тэргэл