Тагнуулын ерөнхий газрын даргаар ажиллаж байсан Б.Билэгт ЦЕГ-ын даргаар томилогдсон билээ. Өмнө нь ЦЕГ-ын даргад албан тушаалыг нь дагуулж генерал цол олгодог байсан бол АН-ынхан энэ журмыг өөрчлөхөөр болжээ. Учир нь ЦЕГ-ын дарга, дэд дарга нь иргэдийн эрх ашгийг хамгаалдаг иргэний төлөөлөл байх ёстой гэж үзсэн байна. Иймээс ч Б.Билэгтийг энэ албанд томилсон гэж тайлбарлаж байна. Б.Билэгт ч ажлаа авсан цагаасаа эхлэн "улс төржихгүй, эрүүгийн бүлэглэлээс ангид байж, цагдаагийн байгууллагад ужгирсан байдлыг халъя" гэсэн зорилготой байгаагаа мэдэгдсэн юм. Анх Б.Билэгтэд генерал цол олгохгүй гэсэн шийдвэрийг хэлэхэд тэрбээр дуртай хүлээж авсан юм байна. Б.Билэгт төрийн албанд 12 жил ажилласан бөгөөд Тагнуулын ерөнхий газрын дарга, Үндэсний аюулгүй байдлын зөвлөлийн Ажлын албаны даргаар ажиллаж байсан юм.
