Коронавирусний халдварын нөхцөл байдлаас үл шалтгаалан бүх шатны сургууль, цэцэрлэгийн үйл ажиллагаа нээгдэх нь. 

Гуравдугаар сарын 1-нээс хичээлийг танхимаар оруулахаар төлөвлөж байгаа гэдгийг салбарын сайд нь өчигдөр мэдэгдэв.

Боловсрол, шинжлэх ухааны сайд Л.Энх-Амгалан "Гуравдугаар сарын нэгнээс танхимын сургалтыг эхлүүлэхээр төлөвлөж байна.  174 мянга гаруй сурагч гар утас, компьютергүй, интернэтгүй байгаагаас теле хичээлээ үзэж чадахгүй байна.  Улаанбаатар хотод гэхэд зөвхөн гэрэл цахилгаангүй 30 мянган хүүхэд байна. Тэд бүгд хичээлээсээ хоцрогдож байна. Ковидын дэглэм сахиж байгаа дэлхийн улс орнууд бүгд буюу 130 гаруй улс танхимын сургалтаа орж боловсролын салбарыг ажиллуулахыг дэмжиж байгаа юм билээ. Гуравдугаар сарын нэгнээс эхэлж танхимын сургалтыг орон даяар эхлүүлэх саналаа УОК дээр илэрхийлсэн. Цаашдаа Засгийн газарт орж хэлэлцүүлнэ" гэсэн юм. 

Танхимаар хичээл орвол халдвар хамгааллын дэглэм мөрдөх үү, оюутан сурагчид, цэцэрлэгийн бяцхан хүүхдүүд коронавирусний халдварт өртвөл яах вэ, халдварын голомт өдрөөс өдөрт нэмэгдэж байхад хүүхдээ боловсрол эзэмшүүлэхийн төлөө эрүүл мэндийг нь золиослох уу гэсэн олон асуулт, эргэлзээ эцэг эхчүүдийн дунд хөвөрч байна. 

Манай улсын боловсролын тогтолцоо, нэг ангид суралцдаг хүүхдүүдийн тоо, орчин нөхцөл ямар болох нь хэнд ч илт. Улсын тодотголтой СӨБ-ын байгууллагын нэг ангид 50-65 хүүхэд суралцаж байхад ЕБС-д 40-50 хүүхэд илүү суралцдаг. Тэгэхээр хүний бөөгнөрөл үүсгэхгүй гэх ДЭМБ-ын зөвлөмжийг зөрчих нь гарцаагүй.

Салбарын яамнаас нэг ангид 20-оос илүү хүүхэд хамруулахгүй, хүүхдүүдийг ээлжээр цэцэрлэг, сургуульд нь суралцуулах гэсэн чиглэлийг өгч байгаа гэх. Энэ нь хөрсөн дээр бууж, амьдралд хэрэгжих боломжгүй гэдгийг багш нар хэлж буй.

СӨБ-ын нэг ангид өдөрт 20 хүүхэд авлаа гэхэд 1-1.5 метрийн зай бариулж, хичээлүүлэх, унтаж амраах зай талбайн боломж байхгүй гэдгийг багш нар учирладаг. Энэ жишгээр өмнө нь явж үзсэн. Тухайн үед халдварыг дотооддоо алдаагүй байсан болоод нөхцөл байдал тайван байсан.

Өдгөө коронавирусний халдвар хаалга тогшоод “зогсож” байхад хичээлийг танхимаар явуулна гэдэг маш их эрсдэлтэй гэдэг нь хэн ч ойлгомжтой. Энэхүү вирус нь "Хүүхэд багачуудад туссан тохиолдолд тархи мэдрэлийн системийг гэмтээдэг" гэдгийг эрдэмтэд хэлж зөвлөж байгаа. Ингэхээр БШУ-ын сайдын шийдвэр хэр зөв бол.  Дараа нь гарах эрсдлийг хэн хүлээх вэ.

Угтаа цахим хичээлийн үр өгөөжийг сайжруулж, хичээл үзэх боломжгүй сурагчдын нөхцөл боломжийг хангах нь илүү амьдралд ойр гэдгийг ч хэлэх хүн олон байна. 

Боловсрол мэдлэг хэрэгтэй ч Эрүүл мэнд эрхэм баян.     

Б.Баатар