Замын түгжрэл, улс төрчдийн маргаан, барилгын осол, хүний эрдэнэт амь. Өнгөрсөн долоо хоногт монголчууд дэндүү олон хар мэдээгээр “бөмбөгдүүллээ”. Гэлээ гээд амьдрал үргэлжилж, хар мэдээний ард цөөнгүй сайхан үйл явдал болсныг санаж, гэрэл тусгацгаая. Өнгөрч буй долоо хоногт хүүхдэд ээлтэй олон сайн үйл явдал болсныг сануулъя. Монголын үрс маш олон болтугай.
Долоон сартай хүүгийн үнэгүй мэс засал
Долоон сартай Очир хүүг дөнгөж төрснийх нь дараа зүрх нь цоорхой гэсэн гашуудам мэдээг эмч нар ээж Э.Сүндэрт нь дуулгасан байна. Ийм өвчтэй хүүхдүүдийн адил найман сар хүрэхээс нь өмнө заавал хагалгаа хийлгэх ёстой. Хоёр, гурван нас хүрвэл эмчилгээ хийх боломжгүй болдог гэж эмч нар хэлжээ. Гэхдээ ийм хагалгааг Монголд хийх боломжгүй тул ээж, аав нь энэ хугацаанд Орос, Хятад, Солонгос, АНУ-ын эмнэлгүүдийг судалсан байна. Азаар тэд өнгөрсөн дөрөвдүгээр сард АНУ-ын Техас мужид төвтэй “HeartGift” гэдэг төрийн бус байгууллагатай интернэтээр холбогдож чаджээ. Тэдний тусламжтайгаар Очир хүү өчигдөр АНУ-д New Orlean мужид байдаг “Covington” эмнэлэгт зүрхний цоорхой нөхөх мэс засал хийлгэсэн. Гэхдээ мэс заслын үр дүнгийн талаар шинэ мэдээлэл ирээгүй байгаа ч эмч нар хагалгааны өмнө амжилттай болно гэдэгт итгэлтэй байгаагаа хэлж байсан юм.
Долоон настай хүүхдэд дунгийн суулгац тавих хагалгааг амжилттай болов
ЭМЯ, Австрали улсын Кохлеар фирмтэй хамтран ажиллах ажлын хүрээнд Чих хамар хоолой, сонсголын "ЭМЖЖ" эмнэлэгт хоёр болон долоон настай хоёр хүүхдэд дунгийн суулгац тавих хагалгааг амжилттай хийлээ. Хагалгааны дараа сонсголын нөхөн сэргээлтийг шалгах дэлхийн шинэ технологийг анх удаа Монголд хэрэглэсэн юм. Мөн Европын орнуудад бүрэн төгс шалгарсан хамгийн сүүлийн үеийн шинэ электродыг Азийн орнуудаас анх удаа Монголд нэвтрүүлсэн сэтгэл сэргэм мэдээлэл байна. Манай улсад сонсголын бэрхшээлтэй 120 мянган хүн байдаг бөгөөд жилээс жилд төрөлхийн сонсголгүй хүүхдийн төрөлтийн тоо нэмэгдэх болжээ. Тиймээс дунгийн суулгац тавих хагалгаа амжилттай болсон нь олон сонсголын бэрхшээлтэй хүүхдэд итгэл авчирлаа.
Хүүхэд бүрт 20 мянга
Засгийн газрын хуралдаанаар удаан яригдсан Хүүхдийн мөнгийг олгохоор боллоо. Аравдугаар сарын нэгнээс тооцон 0-18 настай бүх хүүхэд сард 20 мянган төгрөг авах юм. Гэхдээ энэ мөнгийг авахын тулд харьяа газартаа өргөдөл гаргах хэрэгтэй. Халамжийн бодлого хэрээс хэтэрч, дэмий мөнгө цацлаа гэх шүүмжлэл байдаг ч хүүхдэд очиж байгаа мөнгөтэй барьцах хүн байхгүй биз ээ. Мөн ирэх долоо хоногоос "Олонлог”, “Диана”, “Орос дөрөв”, “Эрэл”, “Шинэ монгол”,“Хобби”, “Улаанбаатар элит” зэрэг 18 сургууль сурагчдаа автобусаар зөөхөөр болсон юм.
Олны танил эрхмүүд бүл нэмнэ
Өнгөрч буй долоо хоногт Монголын үрс маш олон болох тоог Хөдөлмөрийн баатар, гавьяат тамирчин Х.Цагаанбаатарынхан бүл нэмэх болсон таатай мэдээ байна. Тэд гурав дахь хүүхдээ тэсэн ядан хүлээж байгаа юм. Тэгвэл саяхан сүр дуулиантай хуримаа хийсэн залуу дуучин Ч.Цэлмүүн мөн хөл хүнд гэсэн мэдээлэл тархсан. Цагаан хуримын сар ирж буй энэ өдрүүдэд Монголын үрс улам олон болох болтугай.
Монгол хүн 70 дахь ёкозунагийн болзол хангалаа
Хэдхэн цагийн өмнө монгол хүн Японы мэргэжлийн сумо бөхийн 70 дахь ёкозуна гэгдэх боломжтой боллоо. Энэ сарын башёд озэки Харумафүжи Д.Бямбадорж дараалан 30 давсан амжилттай боллоо. Тэрбээр Какурюу М.Анандтай барилдаж башёгийн 14 дэх даваагаа авсан. Тэрбээр өнөөдөр их аварга Хакухо М.Даваажаргалтай хүч үзнэ. Хэрэв озэки Харумафүжи босоо байж чадвал Японы мэргэжлийн сумо бөхийн 70 дахь аварга болох юм. Эс бөгөөс түүнд ёкозуна цол олгох эсэхийг Ёкозунагийн зөвлөл хэлэлцэж, шийдэх юм. Ямартаа ч Харумафүжи япончуудын атаархлыг төрүүлсэн монгол ёкозуна нарын тоог нэгээр нэмэх боломжтой сайхан мэдээ байна.
Төрийн байгууллагууд зогсоолоо чөлөөлж эхэллээ
Нийслэлийн засаг дарга Э.Бат-Үүл төрийн албан байгууллагуудын гадаах автомашины зогсоолын 80 хувийг иргэд ашиглах тухай захирамж гаргасан билээ. Энэ дагуу яам, төрийн байгууллагууд өмнөх авто зогсоолоо чөлөөлж эхлээд байна. Тухайлбал Байгаль орчин, ногоон хөгжлийн яам иргэдэд зогсоолоо чөлөөлж өгөөд байна. Энэ мэтээр замын түгжрэлийг багасгах, иргэдэд ээлтэй ажлууд бага багаар хийгдсээр байна.
24tsag.mn
